Pavlodardaǵy Sývorov kóshesine Malaısary batyrdyń esimi berildi
PAVLODAR. QazAqparat - Oblys ortalyǵyndaǵy Sývorov kóshesine Malaısary batyrdyń jáne Aımanov - Toraıǵyrov kósheleriniń qıylysynan bastaý alatyn ataýy joq kóshege Batyr Baıannyń esimi berildi, dep habarlaıdy QazAqparat pavlodarnews.kz silteme jasap.
Bul týraly keńeıtilgen alqa májilisinde óńirlik tilderdi damytý basqarmasynyń basshysy Sáýle Osmanova aıtqan.
«Búgingi kúni oblysymyzǵa qarasty qala, aýdandardan 72 kóshe, alty aýyl men bir aýyldyq okrýgtiń ataýyn ózgertýge baılanysty usynystar tıisti onomastıka komıssııalarynda qaralyp, oń qorytyndyǵa ıe boldy, - dedi Sáýle Osmanova. - Onyń ishinde respýblıkalyq onomastıka komıssııasynyń oń qorytyndysy negizinde Lenın men Kýtýzov kósheleriniń ataýlary ózgerdi. Osy jyldyń tamyz aıynda QR Prezıdentiniń Jarlyǵymen Lebıaji aýdany Aqqýly, Kachır aýdany Tereńkól aýdany bolyp qaıta ataldy. Sonymen qatar, qalalar men aýdandardan jańadan kelip túsken 19 kóshe men eki eldimekenniń ataýyn ózgertý boıynsha qujattarǵa pysyqtaý jumystary júrgizilýde».
Basqarma basshysy Elbasynyń tapsyrmasyna sáıkes óńirimizde ıdeologııalyq turǵydan eskirgen, qaıtalanatyn ataýlardy tarıhı jer-sý ataýlary jáne ulttyq tanymǵa jaqyn dástúrli ataýlarmen ózgertý boıynsha jumys jalǵasyp jatqanyn atap ótti.
«Jalpy ıdeologııalyq turǵydan eskirgen Sovetov, 70 let oktıabrıa, Oktıabrskaıa, Ermakovskaıa, Proletarskaıa, Lenın, Mıra, Chapaev, Frýnze, Kalının tárizdi ataýlar Saraıshyq, Qaınar, Aqtaý, Eńbek, Beıbitshilik, Bolashaq sııaqty jastarǵa tárbıelik maǵynasy zor ataýlarmen almastyryldy. Qazirgi ýaqytta Jelezın aýdanynyń Jelezın № 3 orta bilim berý mektebine Mirjaqyp Dýlatulynyń jáne Ekibastuz qalasynyń Mıhaıl Glınka atyndaǵy balalar mýzyka mektebine Estaı Berkimbaıulynyń esimderin berý týraly Úkimet qaýlysy ázirlenýde», - dedi Sáýle Osmanova.
