Pavlodardaǵy sherýge 4500 oqýshy qatysty
ASTANA. QazAqparat - Pavlodar qalasynda Halyqaralyq balalar kúnine oraı 4500 oqýshynyń qatysýymen balalar jáne jastar mýzykalyq orkestrleri men ansamblderiniń aýqymdy sherý ótti, dep habarlaıdy pavlodarnews.kz .
Sharaǵa oblystaǵy 73 bilim berý mekemesiniń mýzykalyq ujymdary qatysty. 45 baǵanǵa bólingen 4500 adam 34 kórkemdik bı shyǵarmalaryn oryndady. Ár aýdan men qalalyq mektepterden 100 oqýshydan keldi. Aıtýly merekemen jas órenderdi Pavlodar oblysynyń ákimi Bolat Baqaýov quttyqtap, izgi tilegin bildirdi. - Biz bul sharaǵa eki aıdaı ýaqyt daıyndaldyq, - deıdi Aqtoǵaı aýdanyndaǵy S. Mútkenov atyndaǵy mekteptiń 9-synyp oqýshysy Gúljan Jýmalınova. - Aýdanymyzdan 100 oqýshy qatysyp, sheberlikterin kórsetedi. Kıimderdi arnaıy tiktirip berdi. Keremet sherýge qatysý múmkindigine ıe bolǵanym úshin úlken qýanyshty sezimdemin. Osyndaı merekeler esten ketpeıdi jáne úlken áser qaldyrady.
- Mundaı shara qalamyzda alǵash ret ótkizilip otyr. Ár merekeniń ózindik ereksheligi bar. Al, búgingi balalardy qorǵaý kúni erekshe sándi, shynaıy túrde ótýde. Sherý oqýshylarymyzdyń shyǵarmashylyq áleýetin kóterýge septigin tıgizedi. Barsha qazaqstandyqtardy 1-maýsym merekesimen quttyqtaımyn, - dep tilegin bildirdi qalalyq №9 mektep gımnazııasy ata-analar uıymynyń ókili Vera Sheıher.
Oblystyq bilim berý basqarmasynyń usynǵan aqparatyna súıensek, merekelik sherýdi uıymdastyrýǵa jáne ótkizýge jergilikti bıýdjetten 65,1 mln teńge bólindi. Sondaı-aq, «Samruk-Kazyna Trust» kompanııasy 49 mln 950 myń teńge kóleminde demeýshilik kómek kórsetken. 
