Pavlodardaǵy saýda ortalyǵynda er adam ózin-ózi órtemek boldy
PAVLODAR. QazAqparat - Pavlodar oblysy TJD jedel qutqarý jasaǵynyń psıholog-qutqarýshysy shahardaǵy iri saýda ortalyǵynda ózin-ózi órtemek bolǵan adamdy qutqardy, dep habarlaıdy pavlodarnews.kz.
Keshe Pavlodardaǵy saýda ortalyqtarynyń birindegi basshynyń kabınetinde 58 jastaǵy er adam ózin órtemekshi boldy. Oqıǵa kezinde saýda ortalyǵy qorshalyp, adamdar shyǵaryldy. Agenttikke belgili bolǵandaı, pavlodarlyqtyń bulaı áreket etýine qazirgi kezde saýda ortalyǵy ornalasqan jerdegi úıi úshin alǵan aqshasynyń azdyǵy sebep bolǵan. Budan bir apta buryn er adam kásipker áıelge jáne onyń otbasynyń múshelerine telefon shalyp, qoqan-loqqy jasaǵan. Oqıǵa ornyna órtke qarsy qyzmet ókilderi, medıtsınalyq apat jáne quqyq qorǵaý organdary qyzmetkerleri shuǵyl jetti. Pavlodar oblysy TJD jedel qutqarý jasaǵynyń psıholog-qutqarýshysy Larısa Tıýkalovanyń aıtýynsha, yza býǵan er adam qolyna bes lıtrlik benzın quıylǵan ydysty jáne ottyqty ustap turyp, saýda ortalyǵy ıesinen avtomobıl, páter jáne aqsha talap etken. Ony 30 qyrkúıekke deıin tapsyrýdy buıyrǵan.
"Men onymen saýda ortalyǵynyń basshysy arqyly baılanystym. Áıel adam oǵan barlyq talaptardy oryndaıtynyn jetkizdi. Birtindep ol sabasyna tústi. Ydysty jaýyp, ottyqty stolǵa qoıdy. Odan keıin polıtsııa qyzmetkerlerine ózi berildi»,- dedi Larısa Tıýkalova.
Aıta keteıik, óziniń TJD psıholog-qutqarýshy bolyp bes jyl atqarǵan qyzmetinde Larısa Tıýkalova sońǵy qadamǵa barýǵa sheshim qabyldaǵan kóp adamnyń betin qaıtardy. Al aǵymdaǵy jyly ol 20-dan astam ózin-ózi óltirmek bolǵan adamdy ajaldan aman alyp qaldy.
