Pavlodardaǵy órtten keıin Bilim mınıstrligi barlyq mektepterdi tekseredi

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov Pavlodarda órtengen mektep týraly pikir bildirdi, dep habarlaıdy QazAqparat tilshisi.

«Munyń birinshi jaǵdaı emestigin aıtý kerek. Sondyqtan biz barlyq oqytý uıymdaryna tolyq tekserý júrgizýdi tapsyrdyq. Sebebi órtke qarsy sharalar saqtalýy tıis. Mektep paıdalanýǵa berilgende, jóndeýden keıin jáne jańa oqý jyly bastalar aldynda mindetti túrde aktiler bolýy kerek. Onyń ishinde órtke qarsy qyzmetterden de bolýy qajet. Sondyqtan, meniń oıymsha, mundaı anyqtamalar men aktiler boldy, endi órttiń neden týyndaǵanyn bilý úshin tergeý júrgiziletin bolady. Mende bar aqparatqa sáıkes, kúıik alǵandar men zardap shekkender joq. Tek bir muǵalim osy jaǵdaıǵa baılanysty psıhologııalyq problemaǵa ushyrady. Oǵan psıhologııalyq kómek kórsetilip jatyr», - dedi Ashat Aımaǵambetov Senatta tilshilerge bergen suhbatynda.

Sonymen birge, Bilim mınıstri oqýshylardyń sabaqty qalaı jalǵastyratynyn aıtyp berdi.

«Qazir ǵımarattyń ózine tolyq tekserý júrgiziledi. Tıisti qyzmetter órttiń sebebin anyqtaıdy. Eger ári qaraı oqýǵa esh qaýip bolmasa, balalar oqýyn jalǵastyra alady. Ázirge olar ýaqytsha qashyqtan oqı alady. Al ǵımarattyń jaramsyz ekeni anyqtalsa, ákimdik bul balalardyń oqýyn basqa uıymdarda jalǵastyrý sharalaryn qarastyrady», - dedi A. Aımaǵambetov.

Eske sala ketsek, búgin tańerteń Pavlodardaǵy №28 mekteptiń 200 sharshy metr aýmaǵy órtenip ketti. Mektepten 576 adam, onyń ishinde 551 bala evakýatsııalandy.