Pavlodardaǵy órt er adamnyń ómirin qıyp ketti
PAVLODAR. QazAqparat - Pavlodardaǵy kópqabatty úılerdiń birinen shyqqan órtten er adam qaza tapty, dep habarlaıdy «QazAqparat» HAA tilshisi.
«30 naýryz kúni saǵat 05.11 de Qamzın kóshesindegi toǵyzqabatty úıdiń birinshi qabatyndaǵy sharýashylyq bólme órtendi. 6 sharshy metrdi sharpyǵan tilsiz jaý 1964 jyly týǵan er adamnyń ómirin qıyp ketti. Órttiń bastapqy sebepteriniń biri - shylym shegýdegi abaısyzdyq»,- dep habarlaıdy oblystyq TJD baspasóz qyzmeti.
Órt týraly habar 05.52-de túsip, 06.13-te tolyqtaı óshirildi. Podezden 20 adam shyǵaryldy, olardyń ishinde 7 bala bar. Oqıǵa ornynda 17 órt sóndirýshi men 6 tehnıka jumys istedi.
