Pavlodardaǵy órt: 30 adam qutqaryldy, bir adam qaza tapty
PAVLODAR. QazAqparat - Oblys ortalyǵynda demalys kúnderi tirkelgen órt saldarynan zardap shekken eki adamnyń bireýi kóz jumdy, dep habarlaıdy pavlodarnews.kz.
«12 qańtar kúni, saǵat 17.05-te «Melıorator» baǵbanshylyǵynda Konechnaıa kóshesi, 23 mekenjaıy boıynsha úsh bólmeli aǵash úıdiń qabyrǵalary men jıhazdar, 60 sharshy metr aýmaqta metall tóbe órtendi. Tilsiz jaýdy aýyzdyqtaýǵa № 34 órt sóndirý bóliminiń gaz-tútinnen qorǵaý qyzmeti jumyldyryldy. Úıdiń ıesi 1951 jylǵy er adam. 1948 jylǵy áıeliniń arqasy men sol jaq qolyn birinshi jáne ekinshi deńgeıde alty paıyz kúıik shalǵan»,- deıdi oblystyq TJD-niń baspasóz qyzmetinde.
Vedomstvo mamandarynyń aıtýynsha, zeınetkerge medıtsınalyq kómek kórsetilgen. Jeke quramnan jumyldyrylǵan 12 adam men úsh tehnıka órtti 20.03-te tolyq sóndirgen. Apattyń oryn alý sebebi men keltirilgen shyǵyn kólemi anyqtalýda. Budan basqa, dál sol kúni saǵat 21.22-de kezekshilik bólimine Vorýshın kóshesi, 4/4 mekenjaıy boıynsha «Natalı» dámhanasynan órt shyqqany týraly habarlama túsken. 40 sharshy metrde jıhazdar, tóbeniń jylytqyshy, qazandyq janǵan. Oqıǵa ornynan syıymdylyǵy 50 lıtrlik tórt gaz ballony syrtqa shyǵaryldy. Jeke quramnan shyqqan 12 adam men tórt tehnıka tilsiz jaýdy saǵat 22.52-de sóndirdi. Al keshe, 13 qańtar kúni saǵat 22.17-de Kataev kóshesi, 25 mekenjaıy boıynsha birinshi qabattaǵy bir bólmeli páterde tórt sharshy metr aýmaqta jıhazdar men zattar janǵan. Órt sóndirýshiler kireberisten 61 jastaǵy páter ıesiniń kúıip ketken denesin anyqtady. Gaz-tútinnen qorǵaý qyzmetiniń eki bólimimen órt saǵat 22.52-de sóndirildi. Sondaı-aq, kórshi ornalasqan páterde taratýshy qorabynda janǵan elektr symdaryn páter ıesi ózdiginen aýyzdyqtaǵan. Qutqarýshylardyń kómegimen 30 adam evakýatsııalandy. Onyń jeteýi - bala.
Aldyn ala boljam boıynsha, órttiń shyǵýyna elektr quraldaryn qoldaný barysynda qaýipsizdik erejelerin durys saqtamaý sebep bolǵan.
