Pavlodardaǵy Myrzashoqy taýynda arqan jol iske qosyldy
PAVLODAR. QazAqparat - Baıanaýyl taý-shańǵy bazasy aldaǵy qysta týrısterdi qabyldaýǵa daıyn, dep habarlaıdy pavlodarnews.kz.
Portaldyń jazýynsha, jýyrda taý-shańǵy kesheni iske qosylatyn taýdyń eteginde Pavlodar oblysynyń ákimi Bolat Baqaýov bolyp qaıtty.
Óńir basshysy týrıster joǵaryǵa kóterilýge bolatyn arqan jol paıdalanýǵa berilgenin atap ótti.
«Arqan joldyń uzyndyǵy 960 metr, oǵan eki oryndyq 63 kreslo bekitilgen», - dedi arqan joldyń bas operatory Medet Jetpisbaev.
«Taýdyń ústine belgilengen jyldamdyqqa baılanysty 11-24 mınýttyń ishinde jetýge bolady. Qaýipsizdikti qamtamasyz etý úshin jeldiń jyldamdyǵyn belgileıtin qurylǵy ornatylǵan. Eger ol sekýdnyna 25 metrdi qurasa, joǵaryǵa kóterilý qysqartylady. Budan bólek, rezervtik qýattaý dızel generatory qarastyrylǵan. Baıanaýyl aýdanynda jetkilikti deńgeıde qar túsken kezde sportsúıer qaýym shańǵymen nemese snoýdbordpen syrǵanap, kóńil kótere alady. Týrısterge qyzmet kórsetý úshin taýdyń mańyna kıim sheshetin oryn, qaraý alańy men basqa da úı-jaılar turǵyzǵan. Budan bólek, sporttyq qural-jabdyqtar partııasy satyp alynǵan».
Eske sala keteıik, taý-shańǵy bazasy kún saıyn bes myń adamdy qabyldaı alady. Keshenniń ashylýy Baıanaýyl aýdanynda qysqy týrızmdi damýyna septigin tıgizedi.
Bazanyń iske qosylýy nátıjesinde Myrzashoqy taýynyń eteginde ornalasqan Qarajar aýylynda qosymsha jumys oryndaryn ashýǵa múmkindik beredi.
