Pavlodardaǵy Máshhúr Júsip meshitinde jylyna 1000-nan asa jup nekesin qııady
Aıta keterligi, Qazaqstan musylmandary dinı basqarmasy 2018 jyldy «Islam jáne otbasy jyly» dep jarııalaǵan. Osyǵan baılanysty aptanyń ár beısenbi kúni meshitte otbasyn qurǵan jastarǵa ýaǵyz-nasıhat júrgiziledi.
«Meshitte neke qıdyrýǵa tizimdelgen jastardy ótken naýryz aıynan beri ár aptanyń beısenbi kúni arnaıy shaqyramyz», - dedi meshittiń baspasóz hatshysy Amantaı Toıshybaıuly.
Onyń sózinshe, jastarǵa «Islamdaǵy otbasy», «Sharıǵat boıynsha eri men áıeliniń bir-biriniń aldyndaǵy mindetteri jáne quqyqtary», «Otbasy jylýlyǵy», «Ajyrasý - Alla Taǵalanyń aldyndaǵy eń jaǵymsyz amal» sııaqty kóptegen taqyryptar boıynsha ýaǵyzdar aıtylyp, aqyl-keńester berilip keledi. Bul iske meshit ımamdary men ustazdar belsene atsalysýda. Osy aptanyń beısenbi kúni bul sharany oblys ókildiginiń jalpy jáne jastar isiniń meńgerýshisi, qalalyq Ábý Bákir syddyq meshitiniń bas ımamy Birjan Ákimbekov júrgizgen.
«Qalada nekelesken barlyq jastar Máshhúr Júsip meshitine kelip neke qıdyrady», - dedi bas ımam.
Onyń sózinshe, meshitte neke qıdyrýǵa qatysty barlyq jaǵdaılar jasalǵan.
«Biz nekelesip jatqan jastarǵa otbasy baqyty úshin qandaı jaǵdaı bolmasyn erli-zaıyptylar bir-birine qurmet kórsetip, jaqsy mámilede bolýy kerek ekendigin túsindiremiz. Bir-birine degen qyzǵanysh, basqa da keleńsiz sezimnen boıdy aýlaq ustaý kerektigin aıtamyz. Olarǵa jón siltep, baǵyt-baǵdar beretin Allanyń kálámi Quran men Paıǵambarymyzdyń (Oǵan Allanyń ıgiligi men sálemi bolsyn) hadısterin oqımyz. Eger ómir súrý saltymyzdy osy Islam dinine negizdeıtin bolsaq, otbasymyzda jáne otanymyzda árqashan tynysh bolyp, berekege tolyp eki dúnıeniń baqytyna qol jetkizerimiz anyq»,-deıdi meshittiń baspasóz hatshysy.
Onyń aıtýynsha, bir aptada meshitte 20-dan 25-ke deıin neke qıylady.
«Bir jylda meshitte nekesin qııatyndar sany myńnan asady. Tek qana aqpan men mamyr aılarynda neke qıǵandar sany az bolady. Neke qıǵandardyń arasynda jastar men egde jasqa kelgender de bar. Mysaly, osydan 20-30 jyl buryn otbasyn quramyn deýshiler tek qana azamattyq hal-aktilerin tirkeý bóliminen ótip, meshitke kelmeıtin. Al, qazir meshitte neke qııýdyń mańyzyn túsinip, 60-70 jastaǵy jubaılar kelip jatyr. Bul durys», - dedi Amantaı Toıshybaıuly.
