Pavlodardaǵy Lenın kóshesiniń ataýy «Astana» bolyp ózgertilýi múmkin
PAVLODAR. QazAqparat - Pavlodar qalasynda qalalyq máslıhattyń turaqty komıssııasynyń uıymdastyrýymen oblys ortalyǵyndaǵy Lenın kóshesin Astana ataýymen aýystyrý jóninde qoǵamdyq tyńdaý ótti.
Oǵan Pavlodar qalasy máslıhatynyń depýtattary, qoǵam belsendileri, jastar jáne qala turǵyndary qatysty, dep habarlaıdy pavlodarnews.kz .
«Bizge qalanyń bir top azamattary, zııaly qaýym ókilderi, jazýshylar, ǵalymdar Sholpan Baıǵalynyń atynan Lenın kóshesin Astana kóshesine aýystyrý jóninde ótinish túsirdi», - degen mádenıet jáne tilderdi damytý bóliminiń sektor meńgerýshisi Meıram Nuǵymanov ashyq pikir bildirýge shaqyrdy. - Zańda belgilengen tártip boıynsha tıisti qujattardy jınap, qalalyq máslıhattyń turaqty komıssııasyna usyndyq. Komıssııa kópshilik pikirin bilýge jınaldy. Búgingi qoǵamdyq tyńdaý týraly jarııalanǵan bolatyn».
Qoǵamdyq tyńdaýǵa kelgen kópshilik bastamashy toptyń usynysyn qoldady. Alǵashqy bolyp ólketanýshy, tarıhshy Ernest Sokolkın óz oıyn ortaǵa saldy. - Astana - jas memleketimizdiń sımvoly. Astana - álemderdi tatýlastyrýdyń beıbitshilik alańy. Astana dúnıejúzi mádenıeti men órkenıetiniń ortalyǵyna aınaldy, - dedi Ernest Sokolkın. - Sondyqtan Astana ataýyn elimizdiń qalalarynda qoldaný zaman talaby. Lenın kóshesin Astana dep atý óte oryndy. Ár qalada Astana kóshesi bolý kerek. Men bul usynysty tolyq qoldaımyn! Kópshiliktiń arasynda bul bastamaǵa qarsy shyqqandary da boldy. Olar Lenın kóshesi Astana ataýyna saı emes, tym jupyny, qysqa ári qurylysy eski degen túrli sebepti alǵa tartty. Dese de, Pavlodar qalasynyń qurmetti azamaty, aqyn Sholpan Baıǵaly búginde shahardaǵy 200-den astam kóshe ataýy búgingi kúnniń ıdeologııasyna saı emestigin atap ótti. - Pavlodar - Qazaqstannyń úlken óndiristik aımaǵy, - dedi Sholpan Baıǵaly. -Pavlodar qalasy meniń taǵdyrym men tamyrym. Sondyqtan zaman talabyna saı ataýlardy jańǵyrtý kerek. Osy jyly oblys ákimi Bolat Baqaýovtyń halyq aldyndaǵy eseptik kezdesýinde zamandasymyz, qoǵam qaıratkeri Evgenıı Azarov osy máseleni kótergen bolatyn. Bul suraq sońǵy kezde jıi kóterilgen soń, aımaq basshysyna hat joldap, Lenın kóshesine Astana ataýyn usyndyq. Kópshilik qoldasa, nur ústine nur bolar edi. Nátıjesinde kópshilik tyńdaý barysynda egde tartqan birer turǵyndardan basqasy Lenın ataýyn Astana dep almastyrý oryndy degen usynys bildirdi. Qoǵamnyń pikirin tyńdaǵan halyq qalaýlylary daýysqa salý arqyly ataýdy ózgertý jónindegi usynysty qanaǵattandyrý týraly arnaıy hattama ázirledi. Naqty sheshim qalalyq máslıhattyń sessııasynda belgili bolady.
