Pavlodardaǵy kólikterge oq atqan buzaqyǵa avtobýstardyń dybysy kedergi keltirgen
PAVLODAR. QazAqparat – Marshrýttyq taksıge oq atqany úshin ustalǵan kúdikti 32 jastaǵy otbasyly adam bolyp shyqty. Onyń psıhıkalyq jaǵdaıy tekseristen ótýi kerek, dep habarlaıdy «QazAqparat» HAA tilshisi.
«Malaısary batyr kóshesinde avtobýstar men marshrýttyq taksılerge oq atqan Pavlodar qalasynyń 1987 jyly týǵan turǵyny ustaldy. Kúdiktiniń sózinen belgili bolǵandaı, oǵan avtobýstardyń shýy kedergi keltirgen-mys», - dedi Pavlodar oblysy polıtsııa departamenti baspasóz qyzmetiniń qyzmetkeri Alma Musabekova.
Onyń aıtýynsha, buzaqynyń qylyǵynan eki avtobýs pen úsh marshrýttyq taksıge zaqym kelgen.
«Kúdikti búgin tańerteń jáne keshe keshkisin marshrýttyq taksıge oq jaýdyrǵan. Alaıda júrgizýshiler búgin tańerteń ǵana habar berdi», - dedi A.Musabekova.
Eske sala keteıik, polıtsııaǵa 6 qyrkúıek kúni shamamen 08.40-ta belgisiz bireý buzaqylyq jasamaq bolyp, pnevmatıkalyq qarýdan marshrýttyq taksıge oq atqany týraly habar kelip túsken. Zardap shekkender joq. Atalmysh derek boıynsha QR QK 293 babyna sáıkes («Buzaqylyq») sotqa deıingi tergeý amaldary bastaldy. Pavlodarlyq polıtseıler oq atqan kúdiktini qolǵa túsirdi. Er adam ekinshi qabatta ornalasqan páterdiń terezesinen oq jaýdyrǵan. Pnevmatıkalyq pıstolet tárkilendi. Tergeý jalǵasýda.
