Pavlodardaǵy balabaqshada bolashaq jýrnalıster tálim alýda
ASTANA. QazAqparat - Pavlodardaǵy №126 sábıler baqshasy - balalardyń estetıkalyq damý ortalyǵynda saraptama keńesiniń kezekti otyrysy ótti, dep habarlaıdy pavlodarnews.kz.
Qalalyq bilim berý bóliminiń mektepke deıingi sektor ádiskeri Nurgúl Nurǵalıevanyń aıtýynsha, aı saıyn mártebesi bar balabaqshalardyń ınnovatsııalyq qyzmeti boıynsha saraptama keńesi uıymdastyrylady. 
- Qalada mártebege qol jetkizgen mundaı jeti balabaqsha bar, - deıdi Nurgúl Nurǵalıeva. - Búgin № 126 sábıler baqshasynyń tárbıeshileri bes jyldyń ishindegi jetken jetistikteri boıynsha óz tájirıbelerimen bólisedi. Bul mekemede rejıssýra, ádep, estetıka, beıneleý óneri, horeografııa boıynsha oqytýshylar bar. Qorytyndy bólimde «Jaıdary Kúnkeı» mıýzıkldyń alǵashqy kórsetilimi usynyldy. Spektakl qazaq ulttyq ertegiler jelisinde qoıylǵan. Osy mıýzıkl arqyly kóptilde bilim berý, dıktsııa, teatraldyq sheberlik, horeografııa jaǵynan balalardyń sheberlikteri men qabiletin kórýge bolady.
Balabaqsha meńgerýshisi Marına Zykına mekeme balalardyń estetıkalyq damý ortalyǵy mártebesin 1996 jyly alǵanyn aıtady.
- «TV balalary» telearnasynyń jas jýrnalısteri suraq qoıyp, jaýap berýdi úırenedi jáne shaǵyn jańalyqtardy aıtady, - deıdi Marına Zykına. - Búgin olar «Bizdi bil» tele baǵdarlamasyn usynady. Sonymen qatar, eki aıda bir ret balabaqshada bolyp jatqan oqıǵalar týraly gazet shyǵyp turady. Barlyq mamandar shyǵarmashylyqty damytý boıynsha jumys isteıdi. Ertegi nemese kórme uıymdastyrylady. Dızaın stýdııasynda jaqtaýlar men qumyralardy bezendirip, onyń barlyǵy balabaqsha jáne úı ıntererinde qoldanylady. Elbasynyń tapsyrmasyna sáıkes búldirshinder qazaq, orys jáne aǵylshyn tilderin meńgerýde.
Aıta keterligi, mektepke deıingi bilim berý mekemesi bıyl respýblıkalyq «Bı bala» baıqaýynda «Ogonkı severa» bıimen birinshi oryndy ıelengen. Byltyr jyl saıyn ótetin Dionis respýblıkalyq baıqaýynda «Kórkem sóz» nomınatsııasy boıynsha jeńiske jetken. Qazirgi tańda munda 342 balǵyn tálim-tárbıe alýda.
