Pavlodarda jylý jabdyqtarynyń 92 paıyzy tozyp tur

PAVLODAR. KAZINFORM - Aldaǵy jylý maýsymyna daıyn turýy úshin jylý júıeleri qazirden tekserilip, osal tustary jańartýdan ótkiziledi. Oblystaǵy jylý jelilerin jóndeýge 56 mlrd teńge jumsalmaq.

Osy aptadan bastap Pavlodar, Ekibastuz jáne Aqsý qalalarynda ortalyqtandyrylǵan jylýmen qamtý toqtatylyp, jelilerde gıdravlıkalyq synaýlar bastaldy.

Óńirlik energetıka jáne turǵyn úı-kommýnaldyq sharýashylyǵy basqarmasynyń basshysy Erjan Imanzaıypovtiń dereginshe, ótken qysta tutynýshylardan jylýdyń jetispeýshiligine qatysty 1,5 myń shaǵym túsken.

Jylý parametrleriniń tómendeýi boıynsha 704 jaǵdaı tirkelip, 226 tehnologııalyq kemshilik anyqtalǵan.

Al negizgi jylý jelilerinde kezdesken kemshilikter sany 300-ge jýyqtaǵan.

«Jańa jylytý maýsymyna daıyndyq is-sharalary aıasynda oblystaǵy energııalyq kózderde 39 negizgi jabdyqty, 40 shaqyrymnan astam jylý jelilerin jóndeý josparlanǵan. 337 avtonomdy qazandyq pen 2,2 myń kópqabatty turǵyn úıdi qysqa tyńǵylyqty daıyndaý qajet. Jalpy bizdiń josparymyzsha atalǵan jobalarǵa 56 mlrd teńge qarajat kerek, eń bastysy qarjylandyrý jetkilikti bolsa bolǵany» dep atap ótti ol.

«Pavlodar jylý jelileri» JShS jeke qarajatyna qansha shaqyrym jelini jóndeıdetini qazirgi ýaqytta júrgizilip jatqan synaq jumystarynyń nátıjesinde belgili bolady.

Bul jumystardyń alǵashqy kezeńi 28 sáýirge deıin jalǵasady dep josparlanǵan. 

ıAǵnı Pavlodar qalasynyń ońtústik bóligindegi qubyrlar men júıelerdiń jaı-kúıi shamadan tys qysym berý arqyly tekseriledi. 

Odan soń shahardyń soltústik bóliginde de dál osyndaı is-sharalar júrgizilmek. Al kúzgi synaýlar 31 shilde – 4 tamyz, 5-12 tamyz aralyqtaryna belgilenip otyr.

Kompanııa bas ınjeneriniń orynbasary Pavel Pletýhov jylý jelilerindegi negizgi jabdyqtardyń tozýy 92,2 paıyz ekenin jetkizdi.