Pavlodardaǵy jańa ıppodromnyń qurylysy úshinshi jylǵa sozylyp barady

PAVLODAR. KAZINFORM – Oblys ortalyǵynda salynyp jatqan zamanaýı ıppodrom qurylysy kesheýildep jatyr. Merdiger kompanııa ózine júktelgen mindetti oryndaýǵa qaýqarsyz bolyp shyqqan.

Ippodrom qurylysyn salý boıynsha jobany «Gradstroıservıs» JShS josyqsyz merdiger bolyp shyqty. Ol Pavlodar oblysynda ǵana emes, elimizdiń birneshe aımaǵynda bıýdjet qarjysyna qurylys júrgizý tenderlerin utyp alǵan. Qazirgi ýaqytta sottan sotqa tartylyp jatyr.

– Merdiger uıym qurylys salý boıynsha talaptardy oryndamaýy sebepti 2025 jylǵy 22 mamyrda kelisimshart buzyldy. Osyǵan baılanysty sot kabıneti aqparattyq júıesi arqyly «Gradstroıservısti» memlekettik satyp alýdyń josyqsyz qatysýshysy dep taný týraly talap aryz jiberildi, - deıdi Pavlodar qalasy ákiminiń baspasóz hatshysy Maqpal Qarjaýbaı.

Jaqynda burynǵy merdigerden qalǵan 163 mln teńgeni ıgerý boıynsha qaıtadan konkýrs ótkizilgen. Qazir qurylys qaıtadan jandandy. Jyl aıaǵyna deıin qurylys-montajdaý jumystaryn aıaqtap, keler jyldyń mamyr aıynda ıppodrom ashylady dep kútilip otyr.

Negizi Pavlodarda osydan nebary 10 jyl buryn jańa ıppodrom salynǵan. Alaıda keıin bılik qalanyń bas josparyna túzetý jasap, daıyn ıpodromnyń ornyna jańa shaǵyn aýdan salý jóninde sheshim qabyldady. Keıin oblystyq prokýratýra ekologııasy nashar óndiristik aýmaqta turǵyn úı salýǵa ruqsat bermeı qoıǵan edi.

Eske sala keteıik, Pavlodarda salynyp jatqan mektep qurylysy bıyl aıaqtalmaıtyny belgili boldy.