Pavlodardaǵy Uzynsý aýylynan 9 adam evakýatsııalandy
PAVLODAR. KAZINFORM - Qazir oblys boıynsha sý tasqynyna qarsy is-sharalarǵa 417 adam, 143 tehnıka, 36 motopompa men 4 júzý quraly jumyldyrylǵan. 7 eldi meken men avtojoldardaǵy 5 ýchaske baqylaýda tur.
Qardyń erýi men nóser jańbyrdyń saldarynan aımaqta 8 turǵyn úı sý astynda qalyp otyr.
«Aqtoǵaı, Ertis, Sharbaqty, Tereńkól aýdandarynda ornalasqan 7 eldi meken baqylaýǵa alynyp, sý tasqynyna qarsy is-sharalar júrgizilip jatyr. Bes avtojol ýchaskesine baqylaý júrgizilýde. Aqtoǵaı aýdany Jalaýly aýylynda TJD jáne jergilikti atqarýshy organdardyń kúshimen jaǵdaı turaqtandyryldy. Sý jınaýǵa arnalǵan shuńqyrlar qazylyp, transheıalar salyndy, aýyl kóshelerinen erigen sý sorylyp alyndy. Qazir aýyldaǵy sý deńgeıine baqylaý jalǵasyp jatyr», - dep habarlady óńirlik tótenshe jaǵdaılar departamentinen.
Keshe Ertis aýdanyndaǵy Uzynsý aýylyn topan sýdan qorǵaý úshin respýblıkalyq joldyń buzylǵanyn habarlaǵan edik.
Qazirgi ýaqytta atalǵan eldi mekendegi úıler men aýlalardy sý basýdan aman alyp qalý úshin tasqynǵa qarsy is-sharalar jalǵasýda. Bul jumystarǵa 55 adam, 10 tehnıka, 6 motopompa, 2 júzý quraly jumyldyrylǵan. Departament ókilderiniń aıtýynsha, aýyl turǵyndary sýmen, elektr qýatymen, azyq-túlikpen jáne dári-dármekpen qamtamasyz etildi.
TJD qyzmetkerleri jergilikti atqarýshy organdarmen birlesip Uzynsý aýylynan Ertis aýylyna 9 adamdy evakýatsııalady. Olardyń 7-eýi – bala jáne 1 múgedek pen 1 júkti áıel bar.
