Pavlodardaǵy Ýsolka ózeninde bir top aqqý qystap qalatyn túri bar

PAVLODAR. KAZINFORM — Oblys ortalyǵyndaǵy Ýsolka ózeninde bir top aqqý qalyp qoıdy. Alaıda tabıǵat qorǵaýshylar kıeli qustardyń qystap qalýyna alańdaýly.

Ýsolka ózeniniń Ertis ózenimen toǵysatyn tusynda aǵys óte baıaý. Ózenniń jaǵalaý mańaıy birtindep qata bastaǵanymen, orta tusy áli de aınadaı jarqyrap jatyr. Bul jerdi bir-eki aptadan beri on shaqty aqqý mekendep, qystyń jaqyndaǵanyn umytyp ketkendeı. Tabıǵat qorǵaýshylar sý beti tolyq qata bastasa, aqqýlardyń qorek tabýy qıyndaýy múmkin ekenin aıtady.

Qustardyń kúndelikti tirshiligin baqylap júrgen ormanshylar: «Ózen sýy jyly, qorek mol. Sondyqtan alańdaýǵa esh negiz joq», — dep otyr. Qys mezgilinde aqqýlardyń jyly jaqqa ushpaı qalyp qoıatyn sátteri kezdesip turady eken. Biraq birden on aqqýdyń qalyp qoıýy sırek jaǵdaı.

— Bul — Qyzyl kitapqa enbegen sybyrlaq aqqýlar. On aqqýdyń tórteýi — balapan. Olarǵa eshqandaı qaýip tónip turǵan joq. Biz kún saıyn kelip, qustardy baqylap, tekserip otyramyz. Ýsolka ózeni tolyq muz bolyp qatyp, qustar álsirep nemese mertigip jatatyn bolsa, olardy qamqorlyqqa alamyz, — deıdi oblystyq orman jáne janýarlar dúnıesin qorǵaý mekemesiniń basshysy Ajdar Júsipov.

Qustardyń minez-qulqyna qarap, «qys jyly bolady» dep boljam jasap jatqandar da bar. Sınoptıkterdiń málimetinshe, Ertis-Baıan óńirinde qarasha aıy jyly bolady. Alǵashqy aıazdar jeltoqsannyń ortasynda bastalýy múmkin.

Buǵan deıin Aqmola oblysynda tobynan qalyp qoıǵan aqqý qamqorlyqqa alynǵany týraly jazǵanbyz.