Pavlodardaǵy turaqtandyrý qorynda qansha ónim saqtalyp tur

PAVLODAR. KAZINFORM — Oblys azyq-túlik baǵasynyń arzandyǵy jóninen 12 pozıtsııa boıynsha respýblıkadaǵy óńirler arasynda TOP-5 tizimine kiredi.

Ertis-Baıan óńirinde «Pavlodar» áleýmettik-kásipkerlik korporatsııasy» negizinde qurylǵan bir turaqtandyrý qory jumys isteıdi. Onda búginde jalpy kólemi 9,9 myń tonna azyq-túlik ónimderi saqtalyp tur.

Azyq-túliktiń 12 ataýly túri oblys boıynsha 212 áleýmettik dúken men áleýmettik saýda núktelerinde satylady.

«Pavlodar» áleýmettik-kásipkerlik korporatsııasy» AQ turaqtandyrý qory azyq-túlik qaýipsizdigin qamtamasyz etý departamentiniń dırektory Azamat Dándibaevtiń aıtýynsha, qazirgi kúzgi kezeńde kóptegen azyq túrine tutynýshylar tarapynan suranystyń joqtyǵyna nemese kúrt azaıyp ketkenine baılanysty qorda arnaıy tizimge enetin ónimderdiń keıbiri joq. Qazir máselen naryqtaǵy baǵanyń arzandaýyna baılanysty kókónis ónimderine suranys múlde joq. Eger qorda azyq-túliktiń belgili bir túriniń saqtalý merzimi aıaqtalyp qalsa nemese kóp turyp qalsa, onda ol shartty túrde jetkizýshige qaıtarylady. Jetkizýshi ony keıin jańa ónimmen jańartyp beredi.

— Qorda shamamen 9,9 myń tonna kóleminde 12 túrli azyq-túlik bar (birinshi surypty bıdaı uny, ıodtalǵan tuz, makaron ónimderi, qant, kúrish, kúnbaǵys maıy, pııaz, aq qyryqqabat, sábiz, kartop, qaraqumyq jarmasy jáne birinshi surypty taýyq jumyrtqasy). Barlyǵy aldaǵy aılarǵa jetkilikti kólemde jınalǵan. Óńirlik turaqtandyrý qoryn qalyptastyrýǵa jáne paıdalanýǵa qarajatty jergilikti atqarýshy organdar bóledi. Bizdiń ónimderimiz kelisimshart jasalǵan óndirýshilerde (jetkizýshilerde) saqtalady. Qajet bolǵan jaǵdaıda qorǵa jetkizip beredi. Oblys ortalyǵyna ákelingen azyq-túlikter jergilikti qoımada saqtalyp, odan ári oblystyń seriktes dúkenderine jedel satylyp otyrady, — dep túsindirdi Azamat Dándibaev.

Oblysta birinshi surypty un, taýyq jumyrtqasy, qaraqumyq jarmasy, kartop, sábiz sııaqty óz ónimderin turaqty jetkizip 10 aýyl sharýashylyǵy taýaryn óndirýshi bar.

Turaqtandyrý qory QR Aýyl sharýashylyǵy mınıstrligi usynǵan ótinimderge sáıkes, ár 3 aıǵa qajettiliktiń 50%-na deıingi kólemde qalyptasady.

— Bizden satylymǵa shyǵatyn azyq-túliktiń baǵasy árdaıym nazarymyzda. Saýda sýbektileri bakaleıa ónimine 10 paıyzdan aspaıtyn, al kókónis pen kartopqa 15 paıyzdan aspaıtyn ústemeaqy qosýǵa erikti, — dep qosty qor ókili.

Atap óterligi, Pavlodar oblysy azyq-túliktiń arzandyǵy jóninen 12 pozıtsııa boıynsha respýblıkadaǵy TOP-5 kirip otyr. Olar — birinshi surypty un, kúrish, qaraqumyq jarmasy, sary maı, kúnbaǵys maıy, sút (2,5%), aıran (2,5%), súzbe, kartop, sábiz, pııaz jáne qyryqqabat. Baǵany yryqtandyrý jaǵynan oblystyń pozıtsııasy jaqsara túskeni baıqalady. Byltyr bul ýaqytta TOP-5-ke atalǵan óńirden 7 azyq-túlik túrli ǵana engenin jazǵanbyz. 

Eske sala keteıik, áleýmettik mańyzy bar azyq-túlik óndirýshilerine arnalǵan tarıf jyl sońyna deıin óspeıdi.