Pavlodardaǵy turaqtandyrý qorynda 11 myń tonnadan astam ónim bar - ákimdik

PAVLODAR. KAZINFORM - Óńirdiń turaqtandyrý qorynda jalpy somasy 2,3 mlrd teńge, 11 myń tonnadan asatyn azyq-túlik saqtalyp tur. Búginde ol jergilikti dúkenderge kóptep shyǵaryla bastaǵan.

Pavlodar oblysynda azyq-túlik taýarlarynyń 15 túri boıynsha baǵa respýblıkalyq mánnen tómen deńgeıde saqtalyp otyr. Al taýarlardyń 9 túri boıynsha aımaq TOP-5-tikke kiredi. Óńirde tuz ben makaron ónimderi qymbattyraq.

- Turaqtandyrý qorynda quny 2,3 mlrd teńge bolatyn 12 túrli azyq-túlik saqtalyp tur. Jalpy kólemi 11 myń tonnadan asady. Naryqtaǵy baǵa jaǵdaıyn eskere otyryp, ótken jyldyń 1 jeltoqsanynan bastap kókónisterdi dúkenderge jetkize bastadyq. 1 aqpandaǵy jaǵdaı boıynsha 684 tonna kartop, 277 tonna sábiz, 116 tonna pııaz jáne 102 tonna qyryqqabat satyldy. Ónimderdi satý turaqtandyrý qorynyń 209 seriktes dúkenderi arqyly júzege asyrylady. Baǵanyń ósýin tejeý úshin turaqtandyrý qoryn únemi tolyqtyryp otyrý, «Aınalym shemasy» boıynsha kásiporyndarǵa nesıeler berý, ónimderdi «Jailau» fermerlik bazary arqyly satý jáne apta saıyn aýyl sharýashylyǵy jármeńkelerin ótkizý sharalary júrgizilip jatyr, - deıdi oblystyq kásipkerlik jáne ındýstrııalyq-ınnovatsııalyq damý basqarmasynyń basshysy Lıýdmıla Kýrmanova.

Óńirdegi deldaldyq shemalardy tergeý jónindegi komıssııa óndirýshi men sońǵy tutynýshy arasyndaǵy tıimsiz deldaldardy anyqtaý úshin reıdter júrgizip, 11 zań buzýshylyqty anyqtady. Onyń ishinde bes jaǵdaı Ekibastuzda jáne jeteýi Aqsýda tirkelgen.

Eske sala keteıik, Pavlodarda kartopty qymbat baǵaǵa satyp kelgen 8 dúkenniń ıesi jazalandy.