Pavlodardaǵy sýburqaqtardyń kóbi jóndeý kútip tur
PAVLODAR. KAZINFORM — Oblys ortalyǵyndaǵy kommýnaldyq sýburqaqtardy kútip ustaýǵa bıyl bıýdjetten 76 mln teńge bólingen.
Pavlodarda bıyl jaz erekshe ystyq. Aptap ystyqta qala turǵyndary sýburqaqtardy jaǵalap, saıa tabýda.
Oblys ortalyǵynda kommýnaldyq 22 sýburqaq ornalasqan. Qala ákimdiginiń málimetinshe, olardyń 50% -dan astamy 15 jyl buryn salynǵan.
Sýburqaq tostaǵandarynyń negizgi qaptaý bóligine aǵymdaǵy jóndeý júrgizý qajet (plıtkalardy aýystyrý).
Olardyń jabdyqtary jyl saıyn maýsym aıaqtalǵannan keıin qalpyna keltiriledi, isten shyqqandary jańasymen aýystyrylady.
— 22 sýburqaqtyń úsheýi 5 jyldan az ýaqyt buryn salynǵan («Máshhúr Júsip» meshiti, «ıÝ. Gagarın atyndaǵy saıabaq», Metallýrgter saıabaǵy), 4 sýburqaqta jabdyqtar men qaptama plıtkalardy aýystyrýmen jóndeý jumystary júrgizildi. Qazirgi zamanǵy dızaınmen bezendirilgen 3 qurǵaq sýburqaq jumys isteıdi. Estetıkalyq tartymdylyǵynan bólek, barlyq sýburqaqtar shahar ekologııasyn jaqsartýǵa da qyzmet etedi. Ásirese qurǵaq klımat jaǵdaıynda aýany ylǵaldandyrýǵa kómektesedi, jazdyń ystyq kúnderi salqyndatý áserin qamtamasyz ete alady, — deıdi ákimdiktiń abattandyrý sektorynyń meńgerýshisi Álibek Orazalın.
Nysandardy kútip-ustaýǵa jáne aǵymdaǵy jóndeýge bıyl 76 mln teńge bólingen.
Qarajat árbir sýburqaqtaǵy operatorlardyń jalaqysyna, sýburqaqtardy jınaýdyń hımııalyq quraldary men sý berý-aǵyzý kommýnaldyq shyǵyndaryna, aǵymdaǵy jóndeýge, qaptama plıtkalaryn, isten shyqqan sorǵylardy aýystyrýǵa, ózge shyǵys materıaldaryna jumsalady.
Ákimdik ókilderi sýburqaq aınalasynda serýendep júrgen turǵyndardan turmystyq qoqystardy (plastık paketter, qaǵaz) laqtyrmaýdy suraıdy.
Baqylaýsyz qalǵan balalar sýburqaqqa shomylyp jatatyn jaǵdaılar jıi kezdesedi. Negizi sýburqaqtardyń tostaǵandaryndaǵy sýǵa túsýge qatań tyıym salynǵan. Sondyqtan jaz mezgilinde ata-analar buǵan erekshe nazar aýdarǵany mańyzdy.
Eske sala keteıik, Shymkenttegi mýzykalyq sýburqaqtan Qazaqstannyń kórikti jerlerin tamashalaýǵa bolady.