Pavlodardaǵy synaq kezinde jelilerde 57 aqaý anyqtalyp, qalanyń bir bóligi ystyq sýsyz qaldy
PAVLODAR. KAZINFORM — Oblys ortalyǵynyń basym bóligi júrgizilip jatqan gıdravlıkalyq synaqtarǵa baılanysty qazirgi ýaqytta ystyq sýdan ajyratylǵan. Qala ákimdigi sý berý birtindep qalpyna keltiriletinin habarlady.
Pavlodar qalasynda gıdravlıkalyq synaqtar 3 tamyzdan bastap soltústik jelilik aýdanda bastalǵan. Osy kezeńnen bastap shahardaǵy kópqabatty úıler kezeń-kezeńimen ystyq sýdan ajyratyldy. Al 7 tamyzdan bastap mamandar ońtústik jelilik aýdandaǵy jelilerdiń beriktigin tekserýge kiristi.
Qala ákimdiginiń málimetinshe, soltústik aýmaq boıynsha synaqtar aıaqtalyp, 57 aqaý anyqtalǵan. Jaryq shyqqan qubyrlarǵa qatysy joq, ıaǵnı bútin jelilerge jalǵanǵan úılerge jýyqta sý qaıta beriledi.
— Ońtústik jelilik aýdanda gıdravlıkalyq synaqtar jalǵasady, olar 12 tamyzǵa deıin sozylady. Bul jumystar aıaqtalǵan soń tutynýshylardy ystyq sýǵa kezeń-kezeńimen qosý bastalady. Atqarylyp jatqan jumystar aldaǵy jylytý maýsymynda turǵyndardy sapaly ári senimdi jylýmen qamtamasyz etýge baǵyttalǵan, — dep habarlady Pavlodar qalalyq ákimdiginen.
Qazirgi ýaqytta qansha kópqabatty úıdiń ystyq sýsyz otyrǵanyn ákimdik naqty aıta almaıdy. Tizimder jańartylyp jatyr, al qosylýdyń tolyq kestesi keıinirek jarııalanady.
Eske sala keteıik, elimizde 1,9 myń shaqyrym sý qubyry jańartylatyny anyqtaldy.
