Pavlodardaǵy oıqy-shoıqy jol júk kólikterine shyǵyn keltirip otyr
PAVLODAR. KAZINFORM — Júk kólikteriniń júrgizýshileri Pavlodar qalasyndaǵy aınalma jol retinde belgili Jibek joly kóshesiniń jaǵdaıyna shaǵymdanyp jatyr. Jol jabynynyń ábden ılektelip qalýy saldarynan keıbir júrgizýshi dóńgelek jóndeıtin oryndar men servıstik ortalyqtarǵa jıi júginýge májbúr.
Jibek joly kóshesi — Pavlodardaǵy negizgi tranzıttik baǵyttardyń biri. Bul jolmen kún saıyn Óskemen tarapynan Reseıge qaraı ártúrli elderden qatynaıtyn aýyr júk kólikteri ótedi.
Júrgizýshilerdiń aıtýynsha, joldyń negizgi problemalary temirjol ótkelderiniń mańynda baıqalady. Bul ýchaskedegi asfalt jabyndary birneshe aıdan beri deformatsııalanyp, ılektelip qalǵan. Al jekelegen bólikterde oı-shuńqyr paıda bolǵan.
— Jol degen aty ǵana. Mynaý temirjol ótkeliniń jaǵdaıyn qarańyzshy… Onyń ústine «Toqta» degen belgi qoıylǵan. «Toqta» belgisi ne úshin kerek? Onsyz da toqtaımyz. Bul jolmen ótetin kólikterdiń barlyǵy buzylyp jatyr. Mundaı jolmen júrgiń de kelmeıdi, — deıdi Reseıden kelgen júk kóligi júrgizýshileriniń biri.
Jibek joly kóshesiniń boıynda ornalasqan dóńgelek jóndeý sheberhanasynyń qyzmetkerleri bıyl dóńgelek jóndeýge jáne aýystyrýǵa júginetin júrgizýshiler sany aıtarlyqtaı artqanyn atap ótti. Olardyń arasynda Qazaqstan, Reseı, Ózbekstan, Qyrǵyzstan, Túrkııa, Armenııa jáne basqa da elderden kelgen júk kóligi júrgizýshileri bar.
— Reseıge qaraı bet alǵan kólikterdiń barlyǵy osy jolmen ótedi. Túrkııadan da, Armenııadan da keledi, tipti ótken kúzde Frantsııadan kelgen júrgizýshi boldy. Ol túnde dóńgelegin jaryp alyp, osynda kelip aýystyrǵan. Buryn júk kólikteri bulaısha kóp kelmeıtin. Ádette bir-eki dóńgelek aýystyratynbyz. Al bıyl bir aptanyń ishinde ǵana bes-alty dóńgelek aýystyrdyq, — deıdi jóndeý sheberhanasynyń qyzmetkeri Ermek Júsipov.
Júrgizýshilerdiń pikirinshe, joldy jóndeý kezinde bul baǵyttaǵy aýyr júk kólikteriniń qozǵalys qarqyny men kólik salmaǵy eskerilýi qajet.
Pavlodar qalasynyń ákimdigi Jibek joly kóshesine jóndeý jumystary 2023 jyly júrgizilgenin habarlady.
— Bıyl jaz asa ystyq bolýy saldarynan aýyr júk kólikteriniń qozǵalysy qarqyndy jol bóliginiń jabyny deformatsııaǵa kóp ushyrady. Sondaı-aq joldyń keıbir tustary kóterilip ketken, — dep habarlady qala ákimdigi.
Ákimdiktiń málimetinshe, bıyl Jibek joly kóshesinde shuńqyrlardy jamaý jumystary júrgizilgen. Aldaǵy ýaqytta bul jumystardy qaıta júrgizý josparlanyp otyr. Sonymen qatar 2027 jylǵa atalǵan jol ýchaskesine ortasha jóndeý jumystaryn júrgizý qarastyrylǵan.
Eske sala keteıik, jyl basynan beri jol apatynan 137 bala qaza tapty.
