Pavlodardaǵy orman sharýashylyqtaryn tehnıkamen qamtýǵa úsh jylda 1,6 mlrd teńge jumsalǵan

PAVLODAR. KAZINFORM - Ertis-Baıan óńirindegi orman sharýashylyqtarynyń materıaldyq-tehnıkalyq bazasyn nyǵaıtý búginde negizgi másele bolyp tur. Oblystyq ákimdikke qaraıtyn orman qurylymdary órt sóndirý kólikterimen tolyqtaı qamtylǵan.

Pavlodar oblysyndaǵy memlekettik orman qorynyń jalpy aýdany - 478,7 myń gektar. Onyń 275,5 myń gektary (57,5%) ormanmen kómkerilgen. Óńirdegi orman qorynyń saqtalýyna «Ertis ormany» MOTR» RMM, «Baıanaýyl memlekettik ulttyq tabıǵı parki» RMM jáne oblys ákimdigine Pavlodar, Úrlitúp, Maksım-Gorkıı orman mekemeleri, sondaı-aq «Qazaqstan temir joly» ulttyq kompanııasy» AQ men «QazAvtoJol» UK» AQ-nyń jergilikti fılıaldary jaýapty. Ormanda negizinen qaraǵaı, qaıyń, qaraǵash, kókterek, terek ósedi.

«Sońǵy 3 jylda óńirdegi orman mekemeleri úshin oblystyq bıýdjetten shamamen 1,6 mıllıard teńge qarjy bólindi. Oǵan 5 órt avtotsısternasy, 8 traktor, 10 shaǵyn orman órt kesheni, 33 mototsıkl, 16 aǵash otyrǵyzý mashınasy, 11 soqa, 4 dıskili tyrma, 101 ratsııa satyp alyndy. Bıyl 4 órt sóndirý avtotsısternasy jetkizildi. Osylaısha, orman sharýashylyǵyn órt sóndirý mashınalarymen jaraqtandyrý máselesi tolyǵymen sheshilip, bul kórsetkish úsh óńirlik mekemede 100%dy qurady. ıAǵnı 3 mekemede 15 birlik tehnıka bar», - dep habarlady Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasynan.

Jyl sońyna deıin orman kúzeti úshin patrýldik tehnıka, ákimshilik isterdi júrgizýge arnalǵan planshetter satyp alý, sondaı-aq orman sharýashylyqtarynyń radıobaılanysy men uıymdastyrý tehnıkasyn jańartý josparlanyp otyr.

Eske sala keteıik, sońǵy 21 jylda «Ertis ormany» rezervaty ormanshylarynyń eńbegi nátıjesinde janyp ketken aǵashtardyń 45 myń gektardan astamy qaıta qalpyna keltirilgeni týraly jazǵan edik.