Pavlodardaǵy orman rezervattarynda kóshetterdiń jersinýi eki ese tómendegen

PAVLODAR. KAZINFORM — Jergilikti orman qorǵaý mekemelerinde eleýli zań buzý anyqtalǵan. Atap aıtqanda, kóshetterdi esepke alýdyń tıisti deńgeıde júrgizilmeýi, otyrǵyzý materıaldaryn negizsiz esepten shyǵarý, kólemderdi jalǵan ulǵaıtý jáne olardyń tómen jersinýi tirkelgen. 

Pavlodar oblysy prokýrorlary jergilikti orman sharýashylyqtaryn tekserip, birqatar zań buzýdy anyqtaǵan.

— Sońǵy 10 jylda tabıǵı rezervattaǵy kóshetterdiń jersiný deńgeıi eki ese tómendegen, sonymen qatar olardy esepten shyǵarý kólemi artqan. Kóshetterdi esepke alý durys júrgizilmeı, otyrǵyzý materıaldary negizsiz esepten shyǵarylǵan. Sondaı-aq orman kólemderin ulǵaıtyp kórsetý, kóshetterdiń tómen jersinýi de anyqtaldy. Osyndaı kemshilikter saldarynan ormanmen kómkerilgen alqaptardyń azaıýy jalǵasyp jatyr. Mundaı jaǵdaı «Ertis ormany» rezervatynda, Baıanaýyl ulttyq parkinde jáne ózge de orman sharýashylyqtarynda kezdesip otyr, — dep habarlady óńirlik prokýratýradan.

Prokýrorlar jaýapty mekemelerge ekologııalyq zańnama talaptaryn qatań saqtaýdy eskertti.

Anyqtalǵan zań buzy boıynsha qadaǵalaý sharalary qabyldanyp jatyr. Jekelegen jaǵdaılarda protsessýaldyq sheshim qabyldaý úshin materıaldar Sybaılas jemqorlyqqa qarsy qyzmetke joldanǵan.

Polıtsııa departamentine aǵashtardy urlaý jáne kóshetterdi zańsyz tasymaldaý derekteri boıynsha qylmystyq isterdi tergeý, sondaı-aq ýákiletti organdarǵa orman qoryn ulǵaıtý men qorǵaý boıynsha birqatar tapsyrma berildi.

Buǵan deıin Pavlodar ormandarynda órtke qarsy baqylaýǵa drondar jumyldyrylǵanyn jazǵanbyz.