Pavlodardaǵy orman órti aýyzdyqtaldy: tikushaqtan 12 tonna sý tógildi
ASTANA. KAZINFORM — Pavlodar oblysynyń Aqqýly aýdanynda ornalasqan Kókjal ormanshylyǵyndaǵy «Ertis ormany» memlekettik orman tabıǵı rezervaty aýmaǵynda tutanǵan tabıǵı órt aýyzdyqtaldy.
Tótenshe jaǵdaılar mınıstrliginiń habarlaýynsha, órt qurǵaq shóp pen aǵashtardyń janýynan shyqqan. Órtti aýyzdyqtaýǵa «Ertis ormany» memlekettik orman tabıǵı rezervatynyń qyzmetkerleri, Tótenshe jaǵdaılar mınıstrliginiń bólimsheleri, orman sharýashylyǵynyń áýe kemesi jáne TJM-niń «Qazáýequtqarý» AQ tikushaǵy jumyldyryldy.
— Áýe arqyly júrgizilgen sóndirý jumystary barysynda tikushaq tórt márte ushyp, órt oshaǵyna jalpy kólemi 12 tonna sý tókti, — delingen habarlamada.
Qazir oqıǵa ornynda órt oshaǵyn kúzetý jáne qaıta tutanýdyń aldyn alý jumystary júrgizilip jatyr. Aýmaqty «Ertis ormany» memlekettik orman tabıǵı rezervatynyń mamandary baqylaýda ustap otyr. Zardap shekkender týraly aqparat joq.
Tótenshe jaǵdaılar mınıstrligi azamattardy tabıǵat aıasynda órt qaýipsizdigi talaptaryn qatań saqtaýǵa úndedi. Órtti baıqasańyz, 112 nemese 101 nómirine dereý habarlasý qajet.
Eske salaıyq, buǵan deıin búgin el boıynsha jeti orman órti tirkelgenin habarlaǵan edik.
