Pavlodarda ormanda turǵan 6 balaly otbasy deportatsııalandy
PAVLODAR. KAZINFORM - Kámelet jasyna tolmaǵan alty balasy bar reseılik otbasy 2016 jyldan beri Qazaqstan aýmaǵynda turyp kelgen. Neke qııý organynda resmı tirkelmeýine baılanysty balalarynda qujat ta bolmaǵan.
Pavlodar soty 6 balanyń ákesi, Reseı eliniń 36 jasar azamatynyń isin qarap, ony Qazaqstan aýmaǵynan shyǵarýdy uıǵardy. Sheteldik kóshi-qon zańnamasyn buzǵany úshin jaýapqa tartylyp, úsh táýlikke qamaýǵa alynǵan. Sotta er azamat buǵan deıin dál osyndaı ákimshilik jaýapkershilikke tartylǵanyn, biraq materıaldyq jaǵdaıynyń aýyrlyǵyna baılanysty sot belgilegen aýyppuldy tóleı almaǵanyn jetkizgen.
«Er adam sondaı-aq balalarynyń qujatyn resimdeýmen shuǵyldanyp jatqanyn, jaqyn arada azamattyq nekedegi áıelimen turaqty turý úshin Reseı Federatsııasyna ketýdi josparlap otyrǵanyn habarlady», delinedi sot qujattarynda. Sot qaýlysynda deportatsııa merzimi 2024 jyldyń 22 qazany dep kórsetilgen.
Qazaqstan Respýblıkasyndaǵy Bala quqyqtary jónindegi ýákil Dınara Zákıevanyń aqparynsha, reseılik er azamat búginde balalarymen birge óz otanyna ketip úlgergen. Al balalardyń anasy Pavlodarǵa oralýǵa májbúr boldy.
«17 qazan kúni ata-anasy balalaryn alyp Pavlodardan reseılik Barnaýl qalasyna shyqqan. Alaıda qujat máselesine baılanysty anasyn RF shekarasynda ótkizbedi. Qazir ol Pavlodarda, tólqujaty men vızasyna qatysty másele bar. Máseleni sheshýmen shuǵyldanamyz. Barlyǵy durystalǵan soń áıeldi ushaqpen attandyramyz»,-dedi D.Zákıeva.
Áıel buǵan deıin DNQ-test tapsyryp, barlyq b balanyń anasy ózi ekenin dáleldegen. Sondaı-aq er azamat ta olardyń naqty ákesi ekeni anyqtaldy. Anasy balalardyń ekeýin ǵana perzenthanada bosanǵan. Ózgesin úıde kúıeýi ózi bosandyryp alǵany belgili boldy.
Eske sala keteıik, bıyl mamyr aıynda Pavlodar oblysynda eshqandaı qujaty joq 6 bala tabyldy.
