Pavlodardaǵy medıtsınalyq mekemelerdiń kredıtorlyq qaryzy azaımaı tur

PAVLODAR. KAZINFORM – Oblystaǵy emdeý uıymdarynyń bereshegi birneshe mıllıard teńgege ósip ketken. Bul medıtsınalyq qyzmet kórsetý sapasyna aıtarlyqtaı áser etip otyr. 

Pavlodar qalasyndaǵy №1 aýrýhana, Ekibastuz qalalyq aýrýhanasy, óńirlik kardıologııalyq ortalyq jáne Pavlodar qalalyq №5 emhananyń jalpy kredıtorlyq qaryzy 6 mlrd teńgege jýyqtaǵan.

– Aımaq boıynsha birneshe medıtsınalyq uıymda kredıtorlyq bereshek boıynsha másele qalyptasyp otyr. Jıyny 5,8 mlrd teńge bereshekteri bar. Mundaıǵa uıymdardyń basshylary jol bermeýi kerek edi. Jınalyp qalǵan qaryzdyń saldarynan dárigerlik kómek kórsetýdiń sapasy nasharlaıdy, dári-dármekti satyp alý kólemi azaıady. Al saqtandyrý qory tarapynan berilip jatqan qarajat jetkilikti, - deıdi oblystyq densaýlyq saqtaý basqarmasynyń basshysy Iran Shametekov.

Óńir boıynsha bala ólimi, júrek, onkologııa, qan júıesi aýrýlaryna shaldyqqandar sany kóp. Densaýlyq saqtaý uıymdaryna jaǵdaıdy túzeý, qyzmet sapasyn kúsheıtý mindetteri qoıylyp otyr. Barlyq bıýdjettik medıtsınalyq mekemelerge monıtorıng júrgiziledi. Jol kartasy ázirlengen. Bas dárigerlerdiń jumysy KPI kórsetkishterimen baǵalanady.

Pavlodar oblysyndaǵy birneshe emdeý mekemesi kredıtorlyq qaryzǵa belshesinen batyp otyrǵany týraly byltyr da jazǵanbyz.