Pavlodardaǵy Lermontov kóshesin jańǵyrtý jumystary júrgizilip jatyr
ASTANA. KAZINFORM – Pavlodar qalasynyń ákimine Lermontov kóshesin jazǵy maýsymǵa jańǵyrtý jospary tanystyryldy.
Ákim Hasar Habylbekov Lermontov kóshesiniń 2,2 shaqyrymdyq bóligin jańartý barysyn tekserdi. Sondaı-aq qala basshysy jumysty jedeldetýdi tapsyrdy.
Merdiger atalǵan ýchaskedegi jumysqa byltyr daıyndalyp, ınjenerlik jelini tóseý men jaryq júıesin qosýǵa kirisken. Qazir jelilerdiń 80 paıyzy daıyn, jumysshylar kóshe shamy tirekteriniń irgetasyn ázirlep jatyr. Bul jumysty bıyl 1 tamyzǵa deıin aıaqtaý josparlanyp otyr.
Sonymen qatar sýarý júıesin ornatý sharýasy da aıaqtalýǵa jaqyn. Jaqynda jumysshylar velojoldy asfalttap, kógaldandyrýǵa kirisedi. Merdiger barlyq shaǵyn sáýlettik buıymdarǵa tapsyrys berip qoıǵan, olardy ornatýǵa daıyn. Búginde jeti balalar jáne jeti sport alańynyń irgetasy quıylyp qoıǵan.
– Tamyz aıynda barlyq qurǵaq jumysty aıaqtaý úshin, qazir isti jedeldetý qajet, – dedi Hasar Habylbekov.
Osy oraıda qala ákimi Lermontov kóshesin jańǵyrtý jumysy jeke baqylaýynda bolatynyn tilge tıek etti.
Aıta ketý kerek, bul jumystar Pavlodar oblysynyń ákimi Asaın Baıhanovtyń tapsyrmasyna sáıkes júzege asyrylyp jatyr. Óńir basshysy qalanyń ınjenerlik jáne qoǵamdyq ınfraqurylymyn jańǵyrtýǵa erekshe kóńil bólip otyr.
Atalǵan jumys «Taza Qazaqstan» ekologııalyq aktsııasy aıasynda atqarylyp jatyr. Jalpy bıyl Pavlodar qalasynda abattandyrý jáne kógaldandyrý jumysy keńinen qolǵa alyndy. Ákimniń aıtýynsha, pavlodarlyq turǵyndar qalany kórkeıtý sharýasyna belsendi atsalysyp jatyr. Eko-aktsııa kezinde qaladan 4000 tonnadan astam qoqys shyǵarylyp, shamamen 400 túp aǵash otyrǵyzyldy.
Sonymen qatar kóktemde avtobýs aıaldamalary, qorshaýlar, jaryq shamdary men baǵdarsham baǵanalary, oryndyqtar tazartylyp, syrlandy. Sol sııaqty jol belgileri men jolaqtary jańartyldy. Bıyl qala aýmaǵynda 20 myń túp aǵash jáne 35 myń gúlzar otyrǵyzý josparlanǵan.