Pavlodardaǵy QAJ mekemesinen 15 smartfon men PlayStation tabyldy
ASTANA. KAZINFORM — Pavlodar oblysyndaǵy qylmystyq-atqarý júıesi mekemeleriniń birinen sottalǵandarǵa saqtaýǵa jáne paıdalanýǵa tyıym salynǵan zattar tabyldy. Bul fakti boıynsha sotqa deıingi tergep-tekserý bastaldy.
Prokýratýra óńirdegi qylmystyq-atqarý júıesi mekemelerinde rejım talaptarynyń saqtalýyn jáne tyıym salynǵan zattardy ishke ótkizý arnalarynyń anyqtalýyn tekserdi.
— Tekserý barysynda mekemelerdiń birindegi úı-jaıdan 15 smartfon, alty Wi-Fi-roýter, symdy jáne symsyz qulaqqaptar, USB-kabelder, flesh-kartalar, Sony PlayStation oıyn prıstavkasy jáne basqa da zattar tabylyp, tárkilendi, — delingen vedomstvonyń baspasóz qyzmeti taratqan habarlamada.
Bul zattardy sottalǵandarǵa saqtaýǵa jáne paıdalanýǵa tyıym salynǵan.
Osy derek boıynsha oblys prokýratýrasy Qylmystyq kodekstiń 371-baby (salǵyrttyq) boıynsha sotqa deıingi tergep-tekserýdi bastady.
Qazir tyıym salynǵan zattardyń rejımdik nysanǵa qalaı jetkizilgeni, olardy ishke ótkizý arnalary jáne buǵan qatysy bar tulǵalar anyqtalyp jatyr.
Qylmystyq-protsestik kodekstiń 201-babyna sáıkes, sotqa deıingi tergep-tekserý múddesine baılanysty ózge málimetter jarııa etilmeıdi.
Eske salaıyq, buǵan deıin Oralda túrmege temeki tasyǵan kolonııa qyzmetkeri sottalǵanyn jazǵan edik.
