Pavlodardaǵy dúkende arandatýshylyq jasaǵan áıel jaýapqa tartylyp, isi sotqa jiberildi

PAVLODAR. KAZINFORM - Polıtsııa dúkenge «Orys tilinde ǵana qyzmet kórsetemiz!» degen jazýy bar paraqtardy japsyryp, beınejazbaǵa túsirip alǵan áıeldiń jeke basyn anyqtady. Oǵan qatysty is qozǵaldy.

«Lakomka» dúkeninde ultaralyq alaýyzdyq týdyratyn sózder jazylǵan paraqsha japsyryp, ony telefon kamerasyna túsirtken áıel adamnyń isin polıtsııa buzaqylyq dep tanydy.

- Atalǵan fakti boıynsha oblys ortalyǵynyń turǵyny anyqtaldy, ol usaq buzaqylyq jasaǵany úshin jaýapqa tartylady. Materıal jınalyp, sheshim qabyldaý úshin sotqa jiberildi, - dep habarlady Pavlodar oblysy Polıtsııa departamentiniń baspasóz qyzmetinen.

Polıtsııa buǵan qosa álgi vıdeoda áıeldi telefon kamerasyna túsirip turǵan er adamnyń arandatýshymen eshqandaı tanystyǵy joq ekenin anyqtaǵan. Arandatýshy áıel ony dúken aldynda kezdestirip, kameraǵa túsirip jiberýdi suraǵan. Oıynda eshteńe joq otaǵasy áıeldiń usynǵan uıaly telefonyn qolyna alyp, túsire bergen. Polıtsııa onymen túsindirý jumystaryn júrgizgen.

Eske sala keteıik, buǵan deıin áldebireýler Lermontov kóshesinde ornalasqan dúkenniń esigine jáne sóresine orys tilinde «Tek qana oryssha qyzmet kórsetemiz!» («Obslýjıvaem tolko na rýsskom!») dep jazylǵan qaǵazdy japsyryp, ony telefon kamerasyna túsirip, keıin áleýmettik jelige júktegeni týraly jazǵanbyz. 

«Qazaq tili» qoǵamy Pavlodar oblystyq fılıalynyń tóraǵasy, oblystyq máslıhat depýtaty Asylbek Týǵanbaı kópshiliktiń arandatýshylyqqa erip ketpeýin surady.