Pavlodardaǵy dúkende arandatýshylyq áreketke barǵandar vıdeoǵa túsip qaldy
PAVLODAR. KAZINFORM - Pavlodardaǵy dúkenge áldebireýler «Orys tilinde ǵana qyzmet kórsetemiz!» degen jazýy bar paraqtardy japsyryp, beınejazbaǵa túsirip alǵan. Ony keıin áleýmettik jelige júktep, sońy úlken shýǵa aınaldy.
Belgili bolǵandaı, áldebireýler Lermontov kóshesinde ornalasqan dúkenniń esigine jáne sóresine orys tilinde «Tek qana oryssha qyzmet kórsetemiz!» («Obslýjıvaem tolko na rýsskom!») dep jazylǵan qaǵazdy japsyryp ketken. Ony telefon kamerasyna túsirip, keıin áleýmettik jelige júktegen.
Bul oqıǵa áleýmettik jeli qoldanýshylary arasynda úlken shý týdyrdy. Jurt «Lakomka» dep atalatyn dúkenniń tez arada jabylyp, basshylyǵyn jaýapqa tartýdy talap etti.
Abyroı bolǵanda, arandatýshylardyń bul áreketi beınejazbaǵa túsip qalǵan. Vıdeoda áıel adamnyń paraqtardy japsyryp, al er adamnyń ony telefon kamerasyna túsirip jatqany baıqalady. Dúken ákimshiligi jazbany áleýmettik jelilerde jarııalap, ultaralyq alaýyzdyq týdyratyn jazýǵa ózderiniń qatysy joǵyn jetkizdi.
Máselege jergilikti qoǵamdyq uıymdar da aralasty. «Qazaq tili» qoǵamy Pavlodar oblystyq fılıalynyń tóraǵasy, oblystyq máslıhat depýtaty Asylbek Týǵanbaı kópshiliktiń arandatýshylyqqa erip ketpeýin suraıdy.
- Dúkenge bógde eki adam kirgen. Arandatýshylyq maqsatta birneshe jerge tek qana oryssha qyzmet kórsetemiz ( obslýjıvaem tolko na rýsskom) degen aqparat jabystyryp, ony vıdeoǵa túsirgen. Artynsha vıdeony áleýmettik jelilerde taratqan. Qazirgi ýaqytta ol adamdar anyqtaldy. Máselemen arnaıy organdar aınalysýda. Qurmetti jerlester, til janashyrlary! Mundaı jaǵdaıda máseleniń baıybyna barmaı turyp, pikir jazyp, bólisip bóten nıetti adamdardyń aqparatymen arandap qalmaýǵa shaqyramyz, - dep málimdedi Asylbek Týǵanbaı.
Óńirlik polıtsııa departamenti atalǵan másele boıynsha ázirshe aqparat bermedi.
Eske sala keteıik, Qyzylorda oblysynda alaýyzdyq týdyratyn jazba taratqan turǵyn sottaldy.