Pavlodardaǵy dron óndirisi qalaı damyp jatyr: kásiporyn dırektory túsindirdi
ASTANA. KAZINFORM – Pavlodardaǵy kásiporyn dron óndirisiniń jańa kezeńine kóshýdi josparlap otyr. Endigi maqsat – dronnyń negizgi bólshekterin el ishinde shyǵarý. Bul týraly kásiporyn dırektory Erjan Áýezov Jibek Joly telearnasynyń «Búgin LIVE» baǵdarlamasynda bólisti.
Erjan Áýezovtiń aıtýynsha, kásiporyn bul baǵytqa Ońtústik Koreıadaǵy mamandandyrylǵan kórmeden keıin bet burǵan.
– Qazir drondardyń aýyl sharýashylyǵynda, jer qoınaýyn paıdalanýda, geologııada, qorǵanys pen qaýipsizdik salasynda keńinen qoldanylyp jatqanyn kórip otyrmyz. Búginde olar kóptegen saladaǵy jumys tásilin túbegeıli ózgertip jatyr. Sondyqtan Qazaqstan osyndaı júıelerdi óndiretin elderdiń qatarynda bolýy kerek dep esepteımiz, – dedi ol.
Qazirgi tańda kásiporyn óndiristiń ekinshi kezeńine ótken. Munda ushqyshsyz ushý apparattarynyń korpýstaryn shyǵarý ıgerilip jatyr.
Onyń aıtýynsha, qyrkúıek aıynda Memleket basshysynyń Ońtústik Koreıaǵa josparlanǵan sapary aıasynda komponentterdi el ishinde óndirý jónindegi kelisimderge qol qoıý josparlanyp otyr. Sonyń nátıjesinde kásiporyn qozǵaltqyshtardy, jerústi basqarý stantsııalaryn jáne baǵdarlamalyq qamtamasyz etýdi Qazaqstanda óndirýdi kezeń-kezeńimen meńgermek.
Kásiporyn basshysy seriktes tańdaýdaǵy negizgi talaptardyń biri tehnologııa transferi bolǵanyn atap ótti.
– Jabdyqty satyp alý jetkiliksiz. Eń mańyzdysy, adamdardyń biliktiligi men tájirıbesi. Bıyl komandamyzdyń bir bóligin Ońtústik Koreıaǵa oqýǵa jiberdik. Shilde aıynda káris ınjenerleri Pavlodarda bolyp, óndiristi iske qosýǵa jáne mamandarymyzdy oqytýǵa kómektesti. Qyrkúıek aıynyń sońynda áriptesterimiz qaıtadan tájirıbe almasýǵa barady, – dedi Erjan Áýezov.
Onyń aıtýynsha, ońtústikkoreıalyq seriktester óz tájirıbesimen bólisýge daıyn. Olar kezinde Batys Eýropa men AQSh-tan tehnologııa alǵan bolsa, búginde sol bilimdi Qazaqstanǵa berýge nıetti.
Qazirgi ýaqytta kásiporynda tórt túrli dron modeli ıgerilip jatyr. Onyń ishinde bir geksakopter, bir kvadrokopter jáne tik ushyp-qonatyn eki ushaq úlgisindegi ushqyshsyz apparat bar.
Aıta keteıik, buǵan deıin, ІІM krımınalısteri drondardy paıdalanýdy meńgerip jatqanyn jazǵan edik.
