Pavlodardaǵy daýyl: 540 sharshy metr tóbe jabyny sógilip, jaryq óshýdiń 28 deregi tirkeldi
PAVLODAR. KAZINFORM — Ertis-Baıan óńirinde qatty jeldiń saldarynan tóbe jabynynyń zaqymdalýyna baılanysty 15 oqıǵa tirkelgen. Keltirilgen shyǵynnyń eń úlken kólemi Aqtoǵaı aýdanyna tıesili, aýdandyq aýrýhananyń kólemi 130 sharshy metrlik tóbe jabyny jelge shydamaı, sypyrylyp túsken.
Óńirlik tótenshe jaǵdaılar departamenti Pavlodar oblysynda soǵyp turǵan surapyl jeldiń saldarynan zaqymdalǵan ǵımarattar men ózge de nysandar týraly sońǵy aqparattarmen bólisti.
— Sekýndyna 28 metrge deıingi qatty jeldiń saldarynan Pavlodar oblysynda tóbe jabyndary men shatyrlardyń buzylýynyń 15 faktisi tirkeldi. Pavlodar qalasynda 2 fakti tirkeldi. Jańaaýyl aýylynda qatty jeldiń saldarynan jeke úıde 12 sharshy metr jáne Torgovaıa kóshesindegi qoımanyń 100 sharshy metr tóbe jabyny buzyldy. Ekibastuzda jáne onyń aýyldyq aımaǵynda 4 fakti tirkeldi: Shiderti aýylyndaǵy kóppáterli úıdiń 30 sh. m shatyrynyń ishinara buzylýy, Shiderti aýyldyq orta mekteptiń 5 sh. m. alańynda, Qulaqól aýylyndaǵy jeke úıdiń 6 sh. m. tóbe jabyny zaqymdalǵany anyqtaldy. Sondaı-aq, qatty jeldiń saldarynan 40 sharshy metr alańda Shıqyldaq aýylynyń Q.Sátbaev atyndaǵy mekteptiń qazandyq shatyry buzyldy. Aqsý men onyń aýyldyq aımaǵynda 4 fakti bar. Aqsý qalasynda qatty jeldiń saldarynan № 2 BJSM tóbe jabynynyń 160 sharshy metri, 26 sharshy metr alańdaǵy transformatorlyq qosalqy stantsııa, sondaı-aq kóppáterli úıdiń qasbetiniń 80 sharshy metri buzyldy. Qalqaman aýylynda qatty jeldiń saldarynan úsh qabatty turǵyn úıdiń qasbetiniń qaptamasyna nuqsan keldi, — dep málimdedi departamenttiń baspasóz qyzmetinen.
Buǵan qosa Aqtoǵaı aýdanynda aýrýhananyń 130 sharshy metr tóbe jabyndysy, Baıanaýyl aýdanynda bir úı men aýyldyq meshittiń, aýyldyq ákimdik pen orta mekteptiń tóbe jabyndary zaqymdalǵan.
Al Aqtoǵaı, Baıanaýyl, Maı, Ertis, Sharbaqty, Ýspen, Aqqýly aýdandary men Aqsý qalasynda elektr qýatynyń óship qalýy boıynsha 28 fakti tirkeldi.
Buǵan deıin Pavlodarda surapyl jeldiń jyldamdyǵy sekýndyna 32 metrge deıin jetkeni týraly týraly jazǵan edik.
Eske sala keteıik, Pavlodarda kúshti jel saldarynan ústine aǵash qulaǵan áıel jan tapsyrdy.
Qatty jelge baılanysty Pavlodar oblysynyń barlyq aımaǵynda sabaqtar onlaınǵa kóshirildi.
