Pavlodardaǵy baý-baqshalarda ala qońyz qaptap ketti

PAVLODAR. KAZINFORM - Pavlodarda ala qońyz qaptap ketti. Zııankester jasyl jelekti otap, baý-baqshany túgel kemirip jatyr.

Turǵyndar bıyl oblysta túrli jándikter kóbeıip ketkenine alańdaýly. Ásirese, baý-baqshalarda túrli qońyzdar tarap, ósimdikterdiń sabaǵymen qosa, tamyryn da jep jatyr. Sonyń biri - saıajaı ıeleri buryn-sońdy kórmegen qara ala qońyzdar.

- Mundaı ala qońyzdardy buryn kezdestirmeppiz. Kóbine kolorado qońyzy kartobymyzǵa túsetin. Ol ózi baıaý jándik. Al mynaý óte jyldam júredi, jolyndaǵynyń bárin jep jatyr. Japyraq jemiri sııaqty, tamyrlanǵan ósimdikterdiń barlyǵyn jaıpaıdy, - dep muńyn shaqty Pavlodar qalasynyń turǵyny Vıktorııa Alekseeva.

Qazirgi ýaqytta oblys ortalyǵyndaǵy saıajaı ıelerine qala ákimdigi jándikterge qarsy hımııalyq óńdeý kontsentratyn taratyp jatyr. Bir lıtri birneshe saıajaı telimin óńdeýge jetkilikti. Alaıda turǵyndar preparat máselesin sheshpeı otyrǵanyn aıtady.

Agroónerkásiptik keshendegi memlekettik ınspektsııa komıtetiniń Pavlodar oblystyq aýmaqtyq ınspektsııasynyń basshysy Arman Shúıkenovtiń sózinshe, ala qońyzdar karantınge jatpaıdy.

- Oblys boıynsha monıtorıng jáne zertteý jumystarymen respýblıkalyq fıtosanıtarlyq dıagnostıka jáne boljaý ádistemelik ortalyǵynyń Pavlodardaǵy fılıaly aınalysady. Zııankesterdi anyqtaǵannan keıin olar zııandy jándiktermen kúresý boıynsha turǵyndarǵa usynystar beredi. QR Aýyl sharýashylyǵy mınıstriniń 2020 jylǵy №100 buıryǵyna sáıkes, tek shegirtkege qarsy kúreske memlekettik bıýdjetten qarajat bólinedi. Odan ózge zııankesterge qarsy hımııalyq óńdeý jumystaryn menshik ıeleri jáne taýar óndirýshiler óz qarajaty esebinen júrgizýi tıis, - deıdi ınspektsııa basshysy.

Buǵan deıin Pavlodardyń eldi mekenderin japyraq jemiri men búıi basyp bara jatqany týraly jazǵanbyz.