Pavlodardaǵy Aımaýytov teatry Oralhan Bókeıdiń «Kerbuǵysyn» sahnaǵa shyǵardy
PAVLODAR. KAZINFORM - Plastıkalyq dramada qoryqtaǵy maraldar men buǵylardyń ómiri baıandalady. Negizgi ıdeıada adamzat jaýyzdyǵynyń ústemdigi kórinis tapqan.
Pavlodardyń Aımaýytov atyndaǵy qazaq mýzyka-drama teatry bıylǵy jyldyń alǵashqy premerasyn usyndy. Premeranyń ataýy - «Kerbuǵy», Oralhan Bókeıdiń attas áńgimesiniń jelisimen qoıylyp otyr.
Jańa qoıylymda qoryqtaǵy maraldardyń tabıǵatpen etene tirshiligi, olardyń adamdarǵa degen tym sengishtiginiń saldarynan qurbandyqqa aınalýynyń jaıy sıpattalady.
Buǵylar men maraldar tabynynyń adamzat áleminen únemi jylylyq izdep, tym sengishtigi bul janýarlardy qurdymǵa qulatty. Kerbuǵy buǵylardyń ishinde eń aqyldysy edi. Ol pende balasyn sheksiz súıetuǵyn. Qoıylym shyrqaý shegine jetkende mamyrajaı tirlik keship júrgen top basy – Kerbuǵynyń on segiz salaly múıizin el-jurttan bezinip, aıdalada júrgen adam Qońqaı kesip áketti.
Kerbuǵynyń bar baǵy – basyndaǵy on segiz salaly múıizi eken. Odan aırylǵan sátten ony tyńdaıtyn, pármenine qulaq asatyn janýar qalmady. Onyń sońyn ala úlken bir maraldar áýleti kúırep tyndy. Qazaqtyń basynan ótken barlyq qaıǵy-qasiretti osy jerge úıe salǵandaı. Ashtyq kórinisi, baqa-shaıan terip ketken jurt, sábıinen aırylǵan ana, kókiregi sherge tolǵan erler... Kóshbasshydan, tamyrynan ajyraǵan eldiń beıshara keıpi.
Aıtyp óteıik, sońǵy ýaqytta kerekýlik teatr plastıkalyq mánerge kóbirek kóńil bólip júr. Akterler ujymynyń deni jastar, shetinen myń buralǵan bıshiler, qajet bolsa kúrdeli trıýkterdi de oryndaıtynyn baıqap júrmiz. Buryn teatrdan adam kóńiliniń joǵyn izdep baratyn, al qazirgi kórermen kóbirek áser kútedi eken.
Drama rejısseri Jangeldi Sadyqovtyń sózinshe, adam men tabıǵat arasyndaǵy qarama-qaıshylyq uǵymdaryn jastar qaýymy keńinen túsine bilýi kerek. Eresekter men jas urpaqtyń zerdesine ekologııalyq tárbıeni sińdirýde mundaı qoıylymdardyń paıdasy zor bolmaq.
Premeralyq qoıylymdaǵy basty rólderdi Jasulan Ámirhan, Temirlan Muqataı sııaqty jas akterler somdady. Teatrdyń beldi ártisi, QR mádenıet qaıratkeri Beıbit Shánim Qońqaı rólin esh kirshiksiz oınap shyqty.
