Pavlodardaǵy aýyldardyń birinde toǵyz jasar tártip saqshysy turady
PAVLODAR. KAZINFORM — Tereńkól aýdanynyń Altaı aýylynda turatyn 9 jasar Tımofeı Stolbovoı aýyldastarynyń tynyshtyǵyn kúzetýge erte bastan den qoıǵan bala. Ol ár kúni erte turyp, anasy tigip bergen polıtsııa kıimin kıedi de qoǵamdyq tártipti baqylaý úshin aýyl kóshelerin aralaýǵa shyǵady.
Tımofeı — óte jaýapty bala. Aýyldaǵy ózge turǵyndar tátti uıqyda jatqan ala tańda kishkentaı tártip saqshysy alǵashqy bolyp oıanady. Tóseginen tura sala jýynyp, ústine ózine shaqtap tigilgen polıtseı kıimin kıedi. Iyǵyna oıynshyq avtomatyn ilip alyp, kóshe aralaýǵa shyǵady.
Ol búgin de erte turdy. Kıimin kıip dala shyqty da, aýlada qańtarýly turǵan temir dosy — «Orlenok» velosıpedine mindi. Áskerı joryqqa attanǵaly turǵan ofıtserlershe tulparynyń rýlin sıpap, erkeletip qoıdy.
«Barlyǵy bizdiń baqylaýymyzda, dostym. Qanekeı baqylaýǵa attanaıyq» dep pedaline aıaq saldy.
Aýyl halqy endi ǵana oıana bastapty. Tımofeı áýeli mektep aýmaǵyn aınalyp, barlyǵy durys ekenine kóz jetkizdi. Odan soń kúndelikti daǵdysyna oraı dúken, poshta ǵımarattaryn súzip ótti. Aýyl ishindegi tynyshtyqty ádette Sasha aǵaıdyń qazdary qańqyldap buzatyn. Endi sol jaqqa attanyp bara jatyr edi kenetten ıesiz qalǵan úı jaqtan bógde dybystar estigendeı boldy. Saqshy bala kilt toqtady. Velosıpedinen atyp túsip, dybys shyqqan jaqqa júrdi.
— Bul jerde kim bar?
Biraz únsizdikten soń álgi úıdiń aýlasynan kórshi úıdiń Vaskasy zytyp shyǵa berdi. Álgi jerde jem izdep júrgen kórshiniń taýyqtary mysyqty qyt-qyttap qorqytyp jibergen eken.
— Ýf, sen ekensiń ǵoı Vaska. Jaraıdy bári tynysh bolsa bolǵany.
Tımofeı aýyl ishin kezip júrip tús ýaqyty bolyp qalǵanyn bildi. Ózinshe aıtqanda «túski úzilis». Anasy bul súıip ishetin kójesin daıyndap qoıypty.
— Iá ofıtserim, aýyldaǵy jaǵdaı qalaı eken, — deıdi kúlimdep.
— Barlyǵy tynysh, anashym, aýyl ishi meniń baqylaýymda ǵoı, — dep maqtanyshpen tanaýyn bir tartyp qoıdy.
Tústen keıin ol úshin ekinshi aýysym bastalady. Ata-ájelerdiń joldan ótýine kómektesedi, kóshe qıylystarynda júrgizýshilerdiń baǵytyn rettep jiberedi. Myna jaqta oınap jatqan balalardyń anda-sanda qıys ushqan doptaryn ustap alyp ákelip beredi de, kóshe boıynda dop tebýge bolmaıtynyn eskertedi.
Tártip saqshysy keshkilik úıine sharshap oralsa da kóńili toq. Sebebi onyń ár kúni nebir qyzyq oqıǵalarǵa toly, eń bastysy aýyl ishinde tártip ornaǵan. Endeshe Tımofeıdiń maqsatynyń oryndalǵany.
Uıqyǵa jatar aldynda Altaı aýylynyń kishkentaı tártip saqshysy kıimderin oryndyqqa ádemilep iledi de:
— Erteń jańa kún bastalady, endeshe meni jańa mindetter kútip tur degen sóz. Muǵalimimiz tártip óz-ózinen ornamaıdy deıtin, endeshe ýchaskelik polıtseı Rústem aǵaıǵa meniń kómegim erteń de kerek degen sóz, — dep aıtatyn ádeti bar.
Al aýyldyq ınspektor, polıtsııa maıory Rústem Imanbaev Tımofeı Stolbovoıdy qoǵamdyq tártipti saqtaý isindegi belsendi kómekshisi dep tanıdy. Balanyń polıtsııa qyzmetine qyzyǵýshylyǵy erekshe. Ol bolashaqta el tynyshtyǵyn kúzetetin ofıtser bolýdy armandaıdy. Tártipke degen yntasy men jaýapkershiligi aýyl turǵyndaryn erekshe súısindiredi. Tımofeı — aýyl balalaryna úlgi. Onyń árbir kúni — tártip pen tárbıeniń jarqyn kórinisi.
Eske sala keteıik, Ulttyq dombyra kúnine oraı polıtsııa qyzmetkerleri Medeý muz aıdynynda kúı shertti.