Pavlodarda zorlanǵan jetim qyz 10-qabattan sekirip ketti

NUR-SULTAN. QazAqparat – Pavlodarda zorlyq kórgen jasóspirim 10-qabattan sekirip ketti. Qyz bala tiri qaldy, biraq densaýlyǵyna qatty zaqym kelgen, dep habarlaıdy QazAqparat.

Bul oqıǵa jaıly #NeMolchıKZ qoǵamdyq qorynyń basshysy Dına Tańsári áleýmettik jelidegi paraqshasynda jazdy.

«16 jasar qyz bala 10-qabattaǵy terezeden sekirip ketti. Aǵashtar aman qalýyna septigin tıgizgen, biraq oǵan qatty zaqym keldi.

Qyz balany páterge aldap kirgizip alǵandar zorlaǵan. Qorlyqqa tóze almaǵan ol terezeden sekirip ketti.

Eń qıyny, ol qyz jetim. Pavlodardaǵy jasóspirimder úıiniń tárbıelenýshisi. Bizge onyń jalǵyz jaqyny – jýyrda ǵana kámeletke tolǵan ápkesi habarlasty. Qazir onyń qujattaryn tezdetip jábirlenýshiniń qamqorshysy retinde rásimdeý kerek», - dep jazady ol.

Belgili bolǵanyndaı, sol kúni ol týǵan kúnge barǵan. Otyrys unaǵamandyqtan, shyǵyp ketipti. Ápkesiniń úıine barmaq bolǵan. Biraq, qalany durys bilmegendikten, adasyp ketedi. Jolda úsh jigitti kezdestiredi. Olardyń biri ápkesiniń synyptasy bolyp shyǵady. Ol taksı shaqyryp beretinin aıtyp, ózimen birge aldap ertip áketedi.

Qyzdyń densaýlyǵyna qatty zaqym kelgen. Oǵan 4 ret ota jasalypty. Qazir kórý jáne este saqtaý qabileti nasharlap barady.

Іshki ister mınıstrligi baspasóz qyzmeti taratqan aqparatqa sáıkes, bul is Pavlodar oblystyq polıtsııa departamenti basshylyǵynyń erekshe baqylaýynda.

Kúdiktiler ustalyp, qamaýǵa alynǵan. Birqatar qajetti saraptamalar taǵaıyndaldy. QR QK 120-babynyń 3-1-bóligi, 121-babynyń 3-1-bóligi jáne 105-baby boıynsha sotqa deıingi tergep-tekserýler júrgizilip jatyr.