Pavlodarda aýyr qylmys jasaǵan eki er adam sottaldy

PAVLODAR. KAZINFORM — Pavlodarda 26 jastaǵy Maksım Kalındi óltirdi degen eki kúdikti 18 jylǵa sottaldy.

Tergeý málimetterinshe, Maksım Kalın 2025 jyldyń 4 sáýirinde týǵan kúnin atap ótken. Ol tanysynyń kóligine mingen kezde, olarǵa taǵy bir er adam qosylǵan. Maksım Kalın men dál osy ekinshi adam arasynda jaljal týyndaǵan. Kóliktegi eki er adam Maksımdi uryp-soǵa bastaǵan, sodan keıin ony júksalǵyshqa salyp, zıratqa aparǵan. Olar sol mańda ony uryp-soǵyp, keıin qylmysty jasyrý úshin óltirýdi uıǵarǵan. Kúdiktiler jábirlenýshini kúshtep kólikke otyrǵyzyp, alys aımaqqa aparyp, birneshe ret kólikpen basyp ótken. Maksım alǵan jaraqattarynan qaıtys boldy.

Eki aıyptalýshyǵa qatysty is qozǵaldy. Olardyń biri qylmysty aldyn ala sóz baılasý arqyly top bolyp jasamaǵanyn aıtyp, jaýapkershilikti óz moınyna aldy. Alaıda sot bul sózderge senbedi.  

— QR Qylmystyq kodeksiniń 99-baby, 2-bóliginiń 5, 7-tarmaqtaryna sáıkes, kózdelgen qylmystyq quqyq buzýshylyq jasaǵany úshin kináli dep tanylsyn jáne 18 jyl merzimge bas bostandyǵynan aıyrý túrindegi jaza taǵaıyndalsyn, — dep úkimdi Pavlodar oblysynyń qylmystyq ister jónindegi mamandandyrylǵan aýdanaralyq sotynyń sýdıasy Aınur ıÝsýpova jarııalady.

Sondaı-aq sottalýshylar jábirlenýshiniń otbasyna 10 mıllıon teńge moraldyq shyǵyndy birlesip tóleýge mindetteldi. Úkim áli zańdy kúshine engen joq.

Aıta keteıik, Pavlodarda buǵan deıin anasy men balasy úıinde óli tabyldy.