Pavlodarda jylý berý maýsymy bastaldy
ASTANA. QazAqparat - Pavlodar qalasynda jylý júıeleri iske qosý jumystary ýaqtyly ári kestege sáıkes júrgizilip jatyr.
Bul týraly qala ákiminiń baspasóz qyzmeti málim etti, dep habarlaıdy pavlodarnews.kz .
Eń birinshi kezekte áleýmettik sala nysandarynda jylý berý jumystary bastaldy. Qazirgi ýaqytta 262 nysannyń 237-si qosyldy. Qalǵan 25 nysanda qalypqa keltirý, jóndeý jumystary júrgizilýde. Al turǵyn úılerge jylý berý 2017 jylǵy 22 qyrkúıekten bastaldy. Turǵyn úı qorynyń daıyndyǵy 94 % qurady. Qazirgi kezeńde 239 kóp qabatty turǵyn úı jylýmen qamtamasyz etilip, jylýdy qosý jumystary jospar boıynsha júzege asyrylýda. Aıta keteıik, 6 % nemese daıyndyq sharalaryn ýaqytynda júrgizbegen 75 kóp qabatty turǵyn úı qory jylý maýsymyna daıyn emes. Atalmysh turǵyn úılerge jylý eń sońǵy kezekte beriledi. Qyzmet kórsetýshi uıymdaryn kórsete otyryp jylý berý maýsymyna daıyn emes úılerdiń tizimi Pavlodar qalasy ákimdiginiń resmı saıtynda jáne buqaralyq aqparat quraldarynda jarııalandy.
