Pavlodarda jyl sońyna deıin merekelik tramvaı qatynaıdy
Óńirlik Qazaqstan halqy Assambleıasy óziniń bul bastamasyn Naýryz merekesine jáne Qazaqstan Respýblıkasy Táýelsizdiginiń 30 jyldyǵyna arnap otyr.
«Táýelsizdik jyldary Qazaqstan halqy Assambleıasynyń Tóraǵasy Nursultan Nazarbaevtyń salıqaly saıasatynyń arqasynda elimizde turyp jatqan barlyq etnostar QHA qamqorlyǵymen ózderiniń salt-dástúrlerin damytýǵa múmkindik aldy. Bizdiń etnomádenı birlestikter men jastar uıymdarynyń ókilderi qala turǵyndary men qonaqtaryn Naýryz merekesimen quttyqtaıdy», - deıdi QHA hatshylyǵynyń meńgerýshisi Aınur Raısova.
«Vatan» ázerbaıjan etnomádenı birlestiginiń tóraǵasy Mahmýdov Djafar uzaq jyldar boıy tramvaı basqarmasynda jumys istegen. Ol Assambleıa tramvaıy mereke qarsańynda ásemdelip, jyl sońyna deıin júretinin aıtty.
«Biz alǵashqy saparymyzdy №2 marshrýt boıynsha bastaýdy uıǵardyq. Aldaǵy ýaqytta QHA tramvaıy №5 baǵyt boıynsha júretin bolady», - deıdi Djafar Mahmýdov.
Merekelik sebepke oraı №102 vagondy «Pavlodar qalasynyń tramvaı basqarmasy» AQ Basqarma tóraǵasy Múslim Djafarov ózi júrgizdi. Ol eńbek jolyn 1988 jyly tramvaı basqarmasynda úshinshi klasty tramvaı júrgizýshisi bolyp bastaǵan edi. Assambleıanyń jastar uıymynyń músheleri jolaýshylardy Naýryz meıramymen quttyqtap, tátti syılyqtar taratty. QHA shyǵarmashylyq ujymdary dombyra men syrnaıdyń súıemeldeýimen qazaq halyq ánderin oryndap, olarǵa merekelik kóńil-kúı syılaıdy.
