Pavlodarda jyl sońyna deıin 37 qaıta óńdeý nysany ashylady
ASTANA. QazAqparat - Pavlodar oblysynda bıyl jyl basynan beri aýyl sharýashylyǵy ónimderin óńdeıtin 14 kásiporyn jańǵyrtylǵan. Jyl sońyna deıin taǵy 37 nysan jańǵyrtylyp, iske qosylady, dep habaraıdy pavlodarnews.kz.
Bul týraly búgin oblystyq aýyl sharýashylyǵy basqarmasynyń basshysy Oraz Dúzdenbaev óńirlik kommýnıkatsııalar qyzmetinde ótken brıfıng barysynda aıtty.
«Qazaqstan Respýblıkasynyń Prezıdenti Nursultan Nazarbaev «Qazaqstan joly - 2050» Joldaýynda: «Eimizdiń bolashaǵy agrarlyq saladaǵy qaıta óńdeý kásiporyndaryn qurýda, ıaǵnı shaǵyn jáne orta bıznesti damytý» degen bolatyn. Bizdiń oblysta da osy maqsatta úlken jumys júrgizilýde. Pavlodar oblysynda aýyl sharýashylyǵy ónimderin qaıta óńdeıtin 300 kásiporyn bar. Onyń 221-i ósimdik sharýashylyǵy ónimderin óńdese, 79-y mal sharýashylyǵy boıynsha jumys isteıdi. Jyl sońyna deıin jalpy quny 1541,2 mıllıon teńge bolatyn 37 nysandy jańǵyrtyp, iske qosý josparlanǵan, - deıdi Oraz Dúzdenbaev.
Basqarma basshysynyń sózinshe, aǵymdaǵy jyldyń alǵashqy alty aıynda azyq-túlik óńdeý kólemi 30,7 mlrd. teńgeni quraǵan.
Atap aıtar bolsaq, kúnbaǵys maıyn óndirý 88 paıyz, jarma ónimderi 48 paıyz, sút 13 paıyz, qymyz óndirisi 10 paıyz, makaron shyǵarý 3,5 paıyz jáne kondıterlik ónimderin óndirý 5,6 paıyzǵa artqan.
