Pavlodarda jyl boıy 36 balabaqsha múldem jumys istemegen
PAVLODAR. QazAqparat - Pavlodar qalasynda bıyl jyl boıy 36 balabaqsha múldem jumys istemegen nemese 7 myń 200 oryn bos turǵan, dep habarlaıdy pavlodarnews.kz .
Bul týraly oblys ákimdiginde ótken bilim berý basqarmasynyń alqa májilisinde oblystyq máslıhattyń hatshysy Vladımır Berkovskıı aıtty.
- Oblystyń tekseris komıssııasy men depýtattar Pavlodar qalasynyń 22 balabaqshasyn tekserip shyqty, - dedi Vladımır Berkovskıı. - Árbir balaǵa memleket tarapynan 240 myń teńge bólinedi. Árıne, bul úlken soma emes shyǵar, degenmen qarjy durys maqsatta qoldanylmaı otyr. Balǵyndardyń balabaqshaǵa kelýi 64 paıyzdy ǵana quraıdy. Bul balabaqshalardaǵy árbir úshinshi oryn jyl boıy bos turǵanyn bildiredi. Sondyqtan búldirshinder mektepaldy daıyndyqpen tolyq kólemde qamtylmaı otyrǵan bolsa da, qarjy tolyq ıgerilgen. Onyń aıtýynsha, búginde joldama alýǵa kezekke turǵandardyń qatary qalyń. Buǵan qosa, bes balabaqshada júzý basseıni bar bolǵanmen, onyń bireýi ǵana jumys isteıdi. Máselen, №101 balabaqshada júzý boıynsha jattyqtyrýshynyń joqtyǵyna baılanysty basseınniń jumysy toqtap tur. Osyǵan baılanysty balalar durys barmaıtyn mektepke deıingi mekemelerdiń meńgerýshileriniń eńbekaqysyn qysqartý týraly usynys jasalǵan.
Mundaı jaǵdaıdyń shynymen de oryn alǵanyn oblystyq bilim berý basqarmasynyń basshysy Dinıslam Bolathanuly da rastady. Sondyqtan balabaqshalarǵa joldama berýde ashyqtyqty qamtamasyz etý jáne balǵyndardyń balabaqshaǵa barýyn baqylaý maqsatynda Smart Pavlodar pılottyq jobasy qolǵa alynyp otyr. - Atalmysh baǵdarlama oblys ortalyǵynda jeti mektepke deıingi mekemede engiziledi. Nátıjesinde birinshi kezekte kameralyq baqylaý júzege asyrylady jáne kún saıyn esep berýdiń qajeti bolmaıdy, - dedi Dinıslam Bolathanuly. Dese de, aımaq basshysy mundaı jańashyldyq arqyly jaǵdaıdy kúrdelendirýdiń qajeti joq ekenin atap ótti. - Aýqatty otbasynyń balalary tańerteń aǵylshyn tiline, tústen keıin taǵy da basqa qosymsha daıyndyqqa barady. Eger de bala aýyrmaǵan bolsa, tizimnen shyǵaryp tastańyzdar. Smart Pavlodar jobasynyń qajeti joq. 1 qańtardan bastap kezekte turǵandardy shaqyryńyzdar jáne bul oblys boıynsha barlyq mektepke deıingi mekemelerge qatysty, - degen Bolat Baqaýov orynbasary Meıram Begentaevqa 2018 jyldyń qańtar aıynan bastap tizim qurastyrýdy tapsyrdy.
