Pavlodarda júzden astam saıajaı otqa orandy
ASTANA. QazAqparat - Pavlodarda taǵy saıajaılar otqa orandy. Bul joly da tilsiz jaý 20-ǵa tarta úıdi kúlge aınaldyrǵan, dep habarlaıdy «KTK» arnasy.
Tilsiz jaý osymen tórtinshi kún qaýip tóndirýde. Ótken táýlikterde shamamen 80 saıajaı janyp ketse, búgingi qırandylardy qosa alǵanda, olardyń sany júzden asyp jyǵylady. Abyroı bolǵanda, adam shyǵyny joq. Qyzyl jalynnyń betin qaıtarýǵa 20 órt sóndirýshi kelgen. Qalalyq sý arnasy mekemesiniń sý tasýshylary da kómektesipti. Osy 4 kún ishinde órtti aýyzdyqtaýǵa 200 tonnadan astam sý jumsalǵan. Qazir onyń shyǵý sebepteri naqtylanýda. Al jer telimderi janyp kete jazdaǵan turǵyndar barlyǵy kórshiles saıajaı ıeleriniń salǵyrttyǵynan boldy dep otyr.
