Pavlodarda júzdegen tonna úıilip jatqan medıtsınalyq qaldyqtar anyqtaldy
PAVLODAR. KAZINFORM - Áleýmettik jelide polıetılen qapshyqtarǵa salynyp, úıilip jatqan medıtsınalyq qaldyqtar týraly beınejazba tarap ketti. Ekologtar onyń medıtsınalyq qaldyqtardy órteýmen aınalysatyn «BB-Group KZ» JShS-na tıesili ekenin aıtady.
Taý-taý bolyp úıilip jatqan polıetılen qapshyqtardyń ishi medıtsınalyq shprıtster men sıstemalarǵa, quraldarǵa toly. Olardy qańǵybas ıtter ary-beri súırep, aýrý taratyp jatqandaı áser qaldyrady. Jelide taraǵan beınejazbadan kópshilik osyndaı jaǵymsyz kóriniske kýá boldy.
Máselege Pavlodar oblysynyń ekologııa departamenti birden kóńil aýdarǵan. Mekeme mamandary polıtseılermen birge «KSP Steel» JShS-nyń soltústiginde ornalasqan aýmaqqa baryp, aldyn ala qaraý júrgizgen.
- Atalǵan jer telimin qaraý barysynda qoldanylǵan quraldardan, qanmen bylǵanǵan túrli zattar men shúberekterden, shprıtster men sıstemalar jáne taǵy da basqa zattardan turatyn medıtsınalyq qaldyqtarǵa keziktik. Ýchaskelik polıtseıdiń aıtýynsha, atalǵan jer telimi medıtsınalyq qaldyqtardy qabyldap, joıý qyzmetimen shuǵyldanatyn «BB-Group KZ» JShS-na tıesili. Kompanııada qaldyqtardy joıatyn modýldi pesh, II sanattaǵy obektilerge áser etýge ruqsat qaǵazy, qaýipti qaldyqtardy óńdeý, zalalsyzdandyrý, ýtılızatsııalaý jáne (nemese) joıýǵa lıtsenzııasy bar, - dep habarlady óńirlik ekologııa departamenti basshysynyń orynbasyr Áset Syzdyqov.
Onyń sózinshe, bul medıtsınalyq qaldyqtardy sanıtarlyq-epıdemıologııalyq qyzmet mamandary baqylaýy kerek edi. Sebebi mundaı qaýipti qaldyqtardy saqtaıtyn arnaıy konteınerler, peshter, olardy saqtaý merzimderi, joıý tehnologııalary arnaıy sanıtarııalyq talaptarda kórsetilgen. Al ekologııa departamenti mundaı jaǵdaıda tek kásipkerlik nysanynyń jerge ornalasý aktisiniń zańdylyǵyn ǵana teksere alady. Bul úshin mindetti túrde shaǵym túsýi kerek.
- Búgin keshke deıin polıtsııa organynan bizge jazbasha hat túsýi kerek dep kútip otyrmyz. Hat túsisimen biz jospardan tys tekserý uıymdastyrý týraly sheshim shyǵaryp, ony prokýratýrada tirkeımiz. Tek sodan soń baryp qana nysandy teksere alamyz, - dep qosty mekeme ókili.
Al Pavlodar oblysynyń sanıtarııalyq-epıdemıologııalyq baqylaý departamenti mundaı zańsyz kúl-qoqys oryndaryn anyqtaýǵa ekologııa departamenti jaýapty ekenin habarlady.
Óńirlik densaýlyq saqtaý basqarmasynyń ókilderi atalǵan oqıǵa boıynsha qosymsha aqparat beretinin jetkizdi.
Eske sala keteıik, Jetisýda medıtsınalyq qaldyqtardy zańsyz joıǵandarǵa 2 mln teńge aıyppul salyndy.