«7 saǵat boıy sý shashylǵan». Pavlodarda gazdyń janýy toqtatyldy

PAVLODAR. KAZINFORM — Óńirlik tótenshe jaǵdaılar departamentiniń qyzmetkerleri gazgolderdegi gaz órtin tolyqtaı joıdy.

Jalyn ózge aýmaqtarǵa taralyp ketpeýi úshin 7 saǵattan astam ýaqyt boıy sý shashyp, ustap turýǵa májbúr bolǵan.

Oblys ortalyǵynda 800-den astam adamdy qaýipsiz aýmaqqa kóshirýge májbúr etken gazgolderdegi órt sóndirildi.

— Syıymdylyǵy 5 tekshe metr bolatyn jerasty jylytý gazgolderi laýlap jandy. Qutqarýshylar sýdy úzdiksiz berýdi uıymdastyryp, gazgolderdi salqyndatý turaqty júrdi. Órt saǵat 16.15-te aýyzdyqtalyp, saǵat 20.58-de tolyqtaı sóndirildi, — dep habarlady Pavlodar oblysy tótenshe jaǵdaılar departamentiniń baspasóz qyzmetinen.

Eske sala keteıik, oblys ortalyǵyndaǵy gazgolderdegi gazdyń janýy týraly aqparat búgin saǵat 13.31-de tirkeldi.

Oqıǵa ornynda tótenshe jaǵdaılar departamentiniń basqarýymen jedel shtab quryldy. Adamdardyń qaýipsizdigin qamtamasyz etý maqsatynda jaqyn ornalasqan ǵımarattardan 850-den astam adam qaýipsiz jerge kóshirildi. Olardyń arasynda jaqyn ornalasqan № 11 orta mektebiniń oqýshylary da boldy.