Pavlodarda júrip bara jatqan kólikten sekirgen er adam kóz jumdy
PAVLODAR. QazAqparat - Pavlodarlyq jedel járdem sońǵy úsh kúnde úsh iri jol apatyna shyqty, dep habarlaıdy QazAqparat Pavlodarnews resýrsyna silteme jasap.
Bul týraly oblystyq jedel járdem stantsııasynyń baspasóz qyzmeti málim etti.
- Alǵashqy iri apat Chernoretsk aýylynan 15 shaqyrym jerde respýblıkalyq tasjolda boldy. 23 qazan kúni saǵat 00:58-de eki kóliktiń jylqy soqqany týraly habar tústi. Oqıǵa ornyna jedel járdem men apattar medıtsınasy ortalyǵynyń toby jiberildi. 9 mınýt ishinde jetti. Ókinishke oraı, eki zardap shegýshini qutqarý múmkin bolmady - 29 jáne 35 jastaǵy er adamdar ómirge súrýge sáıkes kelmeıtin jaraqat aldy. Taǵy eki naýqasty – 36 jastaǵy er adam men 30 jastaǵy áıeldi Pavlodar qalalyq №1 aýrýhanasyna jetkizdi, - dep habarlady baspasóz qyzmeti.
Dál osy kúni Baıanaýyl aýylynan 25 shaqyrym jerde úsh kólik soqtyǵysty. 103 jelisine qońyraý 21:07-de tústi, jedel járdem 12 mınýtta jetti.
Apat saldarynan bes adam zardap shekken. 51 jáne 24 jastaǵy er adamdar men 2 jáne 12 jastaǵy eki bala aýdandyq ortalyq aýrýhanaǵa jatqyzyldy.
- 22 qazan kúni saǵat 18:14-te jedel járdemge er adam júrip kele jatqan kólikten sekirip ketti degen habar tústi. Oqıǵa Solnechnyı kentinen shyǵa beriste bolǵan. 103 qyzmetkerleri 6 mınýt ishinde oqıǵa ornyna jetkenimen, 44 jastaǵy er adamdy qutqarý múmkin bolmady. Ol óte aýyr jaraqat alǵan, - dedi jedel járdem.
