Pavlodarda júrgizýshiden para surap, bosatyp jibergen polıtseı sottaldy
PAVLODAR. KAZINFORM — Avtojoldaǵy tutas syzyqty kesip ótken júrgizýshiden para talap etken burynǵy polıtsııa qyzmetkerine qomaqty aıyppul salyndy.
Pavlodar qalasynyń qylmystyq ister jónindegi aýdanaralyq sotynyń úkiminde kórsetilgendeı, 2026 jylǵy mamyrda Pavlodar — Omby tasjolynda polıtsııa qyzmetkeri jol qozǵalysy erejesin buzǵan júrgizýshini toqtatqan. Ol qarsy qozǵalys jolaǵyna shyǵyp, joldaǵy tutas syzyqty kesip ótken.
Tekserý barysynda júrgizýshi týysyna qońyraý shalyp, kómek suraǵan. Onyń týysy polıtsııa ınspektorymen tanys bolyp shyqqan. Ol ınspektordan júrgizýshini jaýapkershilikten bosatýdy ótingen. Polıtseı buǵan keliskenimen, 30 myń teńge kóleminde para talap etken.
Júrgizýshide sol sátte aqsha bolmaǵandyqtan, ol somany keıin aýdarýǵa ýáde beredi. Nátıjesinde ınspektor ákimshilik hattama toltyrmaı, bosatyp jibergen. Alaıda arada birneshe kún ótkenine qaramastan, júrgizýshi aqshany aýdarmaǵan ári qońyraýlarǵa jaýap bermeı qoıǵan.
Bolmaǵan soń polıtseı júrgizýshi úshin arasha túsken tanysyna habarlasady. Oǵan 15 myń teńge berse jetkilikti ekenin aıtqan.
— Inspektormen qarym-qatynasyn buzǵysy kelmegen tanysy óz qarajatynan 15 myń teńge kóleminde para berýdi uıǵarǵan. Qylmystyq nıetin júzege asyrý maqsatynda ol ózge azamatqa telefon soǵyp, 15 myń teńge qaryz suraǵan, — delingen Pavlodar qalasynyń qylmystyq ister jónindegi aýdanaralyq sotynyń úkiminde.
Aqyrynda ınspektor para alǵan. Alaıda oqıǵanyń mán-jaıy quqyq qorǵaý organdaryna belgili bolyp, qylmystyq is qozǵalǵan.
Sot aldynda burynǵy polıtsııa qyzmetkeri men júrgizýshini jaýapkershilikten bosatýdy suraǵan onyń tanysy jaýap berdi.
Sot ekeýin de sybaılas jemqorlyqqa jol bergenderi úshin kináli dep tanydy. Burynǵy polıtseıge para alǵany úshin 750 myń teńge aıyppul salyndy. Al ekinshi aıyptalýshy para bergeni úshin kináli dep tanylyp, 225 myń teńge aıyppul tóleýge mindetteldi.
Júrgizýshi is boıynsha kýáger retinde ótken.
Eske sala keteıik, Pavlodarda arzan ıpoteka rásimdeımin dep jurtty 80 mln teńgege aldaǵan jigit sottaldy.
