Pavlodarda júrgizýshi jas balany kóligimen qaǵyp, oqıǵa ornynan qashyp ketken
PAVLODAR. QazAqparat - «Daimler Benz» kóliginiń 23 jastaǵy júrgizýshisine qatysty eki bap boıynsha óndiris qozǵaldy. Oǵan aıyppul salynyp, kóligi aıyp turaǵyna qoıyldy, dep habarlaıdy QazAqparat.
«26 naýryz kúni saǵat 15.00-de Pavlodar qalasynda júrgizýshi kóligimen Lomov kóshesindegi 154/4 úıdiń aýlasynda júrip kele jatyp, onda kámelet jasyna jetpegen jaıaý júrginshini qaǵyp ketken. Júrgizýshi oqıǵa ornynan izin sýytty», - dep baıandady Pavlodar oblystyq polıtsııa departamenti jergilikti polıtsııa qyzmeti bastyǵynyń orynbasary Qýanysh Mustafınov.
Onyń aıtýynsha, jaıaý júrginshi aýrýhanaǵa medıtsınalyq kómek surap kelgen.
Onyń densaýlyǵyna kelgen zııan aýyrlyǵynyń deńgeıin anyqtaý úshin sot-medıtsınalyq saraptama taǵaıyndaldy.
Aımaqtyq PD baspasóz qyzmetinen polıtsııa qyzmetkerleriniń jaqyn mańdaǵy úıler men kireberisterde ornatylǵan beınetaspa jazbalaryn qarap shyqqanyn, oqıǵa ornynan ketip qalǵan júrgizýshini tabý úshin izdeý sharalaryn ótkizgenin qosyp ótti.
«28 naýryzda polıtsııa júrgizýshi men «Daimler Benz» kóligin anyqtady. 23 jastaǵy júrgizýshige qatysty QR Ákimshilik quqyq buzý kodeksiniń 610, 611 baptary boıynsha ákimshilik is qozǵaldy, aıyppul salyndy. Kólik aıyp turaǵyna qoıyldy», - dedi Qýanysh Mustafınov.
