Pavlodarda jumyssyz jastar oqyp, kásipker atanýda
NUR-SULTAN. QazAqparat - Pavlodarda 135 jumyssyz jas kásipkerlikke oqytyldy. Qazirgi ýaqytta olardyń 37-si memlekettik grant alý quqyǵyna ıe boldy, dep habarlaıdy pavlodarnews.kz.
Pavlodar qalasy jumyspen qamtý ortalyǵynyń oqytý bóliminiń jetekshisi Zarına Ýyqpaeva jastardyń «Jas kásipker» baǵdarlamasy arqyly oqytylǵanyn atap ótti.
«Bul oqýda joq jáne jumyssyz jastarǵa arnalǵan jappaı kásipkerlikti damytýdyń «Eńbek» baǵdarlamasy aıasynda júzege asyrylyp jatqan joba. Oqýdy aıaqtaǵannan keıin olarǵa sertıfıkat beriledi. Sertıfıkat arqyly óziniń bıznes jobasymen 200 AEK mólsherindegi grant ala alady nemese 6 paıyzben 5 jylǵa 16 mıllıon teńgege deıin nesıe alýǵa múmkindik bar», - dedi Zarına Ýyqpaeva. –
2019 jyly 135 jas adamdy oqytý josparlanǵan. 135 adamdy eki topqa bóldik. Birinshi topta 68 adam oqýyn aıaqtasa, ekinshi toptaǵy 67 adam búgin aıaqtaıdy. Birinshi topta oqýyn aıaqtaǵan jastardyń búginde 37-niń 200 AEK nemese 505 myń teńgelik grantqa ótinshi qabyldanǵan.
Kásipkerlik kýrsyn támámdaǵaly jatqan Pavlodar aýylynyń turǵyny Nurjan Erkin aýylynda dúken ashýdy maqsat etip otyr.
«Qazir ár adamnyń jeke kásibi bolǵany durys dep oılaımyn. Ózim áleýmettik dúken ashpaqpyn. Sol armanymdy júzege asyrý úshin osy kýrsqa kelip otyrmyn. Kýrstan kásibimdi qalaı alyp júrý kerektigin úırendim. Ózimniń azdaǵan qarajatym bar. Aldaǵy ýaqytta grant alý arqyly memlekettiń kómegimen dúkendi iske qosý josparda bar. Aýyl turǵyndaryna qajetti zat satqym keledi. Jalpy dúkendi iske qosý úshin qazirgi kezde 1 mıllıonǵa jýyq qarajat kerek. Endi grantqa ıe bolsam, qarjy jetkilikti bolady - deıdi Nurjan Erkin.
Jastardy oqytyp jatqan bıznes bapker Gúlzına Baltabaevanyń aıtýynsha, kýrsty aıaqtaýshylar oblystyq komıssııa aldynda bıznes jobalaryn qorǵaıdy. Jalpy, kýrs barysynda 60 saǵat trenıng ótedi. Jeke konsýltatsııalar da qarastyrylǵan. Oqý aıaqtalǵannan keıin de jastar 12 aı boıy bapker nemese «Atameken» kásipkerler palatasy arqyly bıznesin júrgizýge keńestik súıemeldeý ala alady. «Jas kásipker» jobasyna arnalǵan kýrsta bıznes ıdeıany tańdaý, qarjy josparlaý, naryqty zertteý, esep júrgizý sııaqty bıznesti alyp ketýge kerekti 10 taqyryp qamtylǵan.