Pavlodarda júkti áıelderge arnalǵan pansıonat ashyldy
PAVLODAR. KAZINFORM - Ol jylyna 50 áıelge deıin qabyldaı alady jáne áýelgi kezekte shalǵaı aýyldardan kelip bosanatyn áıelderge baǵyttalǵan.
Pavlodar oblystyq perınataldyq ortalyǵynda júkti áıelderge arnalǵan «Salaýatty ana» pansıonaty ashyldy. Óńirlik densaýlyq saqtaý basqarmasynan habarlaǵandaı, bul jańalyq ásirese shalǵaı aýyldarda turatyn áıelder úshin mańyzdy. Ol akýsherlik patologııasy bar, problemalyq júktilikti bastan keshirip jatqan bolashaq analardyń qaýipsizdigi men jaılylyǵyn qamtamasyz etýge baǵyttalǵan. Pansıonatta táýlik boıy medıtsınalyq baqylaý júrgiziledi.
- Ótken jyl parnıataldyq ortalyq úshin jańarý kezeńi boldy: sımýlıatsııalyq ortalyq ashylyp, osy renovatsııa aıasynda pansıonat iske qosyldy. Qajet bolǵan jaǵdaıda ony keńeıtý de josparlanǵan. Sonymen qatar, perınataldyq ortalyqta áıelder konsýltatsııasy ashylyp, reprodýktolog, ýrolog, endokrınolog jáne ózge de mamandar qabyldaı bastady. Bul bolashaq analarǵa kórsetiletin kómektiń sapasyn arttyrady, - dep habarlady basqarmadan.
Eske sala keteıik, elimizde ulttyq joba sheńberinde 655 densaýlyq saqtaý nysanynyń qurylysy aıaqtaldy.