Pavlodarda júkti áıelderge arnalǵan pansıonat ashylady
PAVLODAR. KAZINFORM - Ol jylyna 50 áıelge qabyldaı alady jáne áýelgi kezekte shalǵaı aýyldardan kelip bosanatyn áıelderge baǵyttalǵan.
Oblystyq perınataldyq ortalyq ishinen ashylǵaly otyrǵan pansıonatta merziminen buryn týǵan náresteleri bar analar da ońaltýdan ótýi múmkin. Qazir atalǵan emdeý uıymynda genetıka kabınetteri, bosanýǵa daıyndyq mektebi, uryqty qorǵaý ortalyǵy, sondaı-aq katamnez kabıneti jumys isteıdi.
– Pansıonatta qala ishinde toqtaıtyn jeri joq, biraq dárigerlik kómekke muqtaj áıelderge kómek kórsetiledi. Biz oǵan jeke ǵımarat bóldik, qazir kúrdeli jóndeý jumystary jalǵasyp jatyr. Pansıonatta platsentanyń tómen ornalasýy, jatyrda kóptegen tyrtyqtary bar jáne basqa da asqynýlary bar áıelder turady dep josparlanýda, - deıdi oblystyq perınataldyq ortalyqtyń basshysy Gúlnar Býrataeva.
«Salaýatty ana» pansıonatyn jeltoqsan aıynda iske qosý josparlanyp otyr.
Aıtyp óteıik, bıyl alǵashqy 10 aıda oblysta 6976 náreste dúnıe esigin ashqan.
Buǵan deıin shala týǵan sábıler qalaı qutqarylatyny týraly jazǵanbyz.