Pavlodarda júkti áıelderdi jalǵan jumysqa ornalastyrǵandar bes jylǵa sottaldy
PAVLODAR. KAZINFORM — Pavlodarda júkti áıelderdi jalǵan jumysqa ornalastyryp, áleýmettik tólemderdi zańsyz kóbeıtý shemasyn uıymdastyrǵan bes áıelge sot úkimi shyqty. Іs boıynsha memleketke keltirilgen zalal 236 mln teńgeden asqan.
Sot málimetinshe, qylmystyq is alaıaqtyq deregi boıynsha qaralǵan. Shemany «Azamattarǵa arnalǵan úkimet» memlekettik korporatsııasy» kommertsııalyq emes aktsıonerlik qoǵamy fılıalynyń Pavlodar aýdany boıynsha áleýmettik qamsyzdandyrý bóliminiń burynǵy basshysy uıymdastyrǵan.
44 jastaǵy áıel qylmystyq shemaǵa óziniń qaıyn sińlisin tartqan. Ol býhgalter bolyp jumys istegen jáne birneshe jeke kásipkerdiń elektrondyq tsıfrlyq qoltańbasyna qol jetkize alǵan.
Sondaı-aq shemaǵa olardyń tanystary da qatysqan. Olar qujattaryn jalǵan jumysqa ornalastyrý úshin berýge daıyn júkti áıelderdi izdestirgen. Áıelderge ádeıi joǵary jalaqy kórsetilip, keıin Memlekettik áleýmettik saqtandyrý qorynan bala kútimine baılanysty joǵary mólsherdegi áleýmettik tólemder alý kózdelgen.
— Sottalýshylardyń kinási kýálardyń aıǵaqtarymen dáleldendi. Kýálardyń barlyǵy sottalýshylardyń olarǵa jumysqa resmı túrde ornalastyrylýy múmkin ekenin jáne osynyń nátıjesinde bala bir jarym jasqa tolǵanǵa deıin aı saıynǵy járdemaqyny joǵary mólsherde alýǵa bolatynyn túsindirgenin kórsetti, — dedi Pavlodar qalasynyń qylmystyq ister jónindegi mamandandyrylǵan aýdanaralyq sotynyń sýdıasy Bıbigúl Sábıtdenova.
Tergeý málimetterine sáıkes, júkti áıelder keıin bala bir jarym jasqa tolǵanǵa deıingi aı saıynǵy tólemderdi ózderinde qaldyrǵan. Al bosanǵanǵa deıin beriletin birjolǵy áleýmettik tólemdi qylmystyq shemaǵa qatysýshylarǵa berýi tıis bolǵan.
Osylaısha 2022-2024 jyldar aralyǵynda atalǵan shema boıynsha 60 áıel jalǵan jumysqa ornalastyrylǵan. Memleketke keltirilgen jalpy zalal 236 mln teńgeden asqan.
Sot is materıaldaryn zerdeleı kele, barlyq sottalýshynyń kinási dáleldendi degen qorytyndyǵa keldi.
Shemany uıymdastyrǵan burynǵy bólim basshysyna 5 jyl merzimge bas bostandyǵynan aıyrý jazasy taǵaıyndaldy. Ol sot zalynda qamaýǵa alyndy.
Onyń qaıyn sińlisine jáne taǵy úsh sottalýshyǵa da 5 jyldan bas bostandyǵynan aıyrý jazasy taǵaıyndalǵan. Alaıda olarǵa jazany óteýdi keıinge qaldyrý túrindegi jeńildik berildi.
Eske sala keteıik, Pavlodarda áıel mas kúıinde jol-kólik oqıǵasyn jasap, júktilik týraly jalǵan anyqtama arqyly ákimshilik qamaqtan jaltarǵan.
